ارحمنا من طلعة جنابك

- شعر: أحمد فؤاد نجم لجمال مبارك الله يرحمة


نظراً لأن النعمة فاقت حدها ولإننا مش قدها

ولأن فعلاً إنجازاتك فو ق طاقتنا نعدها

ولأننا غرقنا فى جمايل مستحيل هنردها

نستحلفك ............. نسترحمك

نستعطفك ........... نستكرمك

ترحمنا من طلعة جنابك حبتين

عايزين نجرب خلقة تانى ولو يومين

أسمع بقى ...

أحنا زهقنا من النعيم وعايزين يومين شقى

عايزين نجرب الاضطهاد ونعوم ونغرق فى الفساد

بينى وبينك حضرتك .. ده شعب فقرى مايستهلش جنتك

أنا عارفُة .. شعب ما ينفعوش إلا شارون وبلير وبوش

عايز يجرب الأمتهان ويعيش عميل للأمريكان

بيمد "غازه" لاسرائيل ويومين كمان ويمد نيل

أهو يعنى نشرب ميه واحدة وندوب فى بعض ماء ماء

ونفض سيرة الأنتماء وبلاها نعرة وطنطنه

تبقى البلاد مستوطنه .. مسلطنه بالسرطنه

أيه اللى خدناه من الكرامة والإباء

حبة خطب وكلام ... كلام

إحنا راهنا على النظام ورضينا بخيار السلام

بخيار حنسد عين الشمس بيه

علشان ما يطلعش النهار

ويطلع لمين ؟؟

حبة معارضة مغرضين ؟؟

وحسب بيان السلطة .. شلة مأجورين ؟؟

ياعم فضها سيرة وأرضى بقسمتك

دا شعب مش فاهم أكيد

يالا أطرده من رحمتك

وان كنت غاوى الحكم خليك مطرحك

هأغطس وأقب وأعود بشعب يريحك

راضى وعمره ما يجرحك

أخرس وما بيسمعش

وأعمي لك عينيه .. مش كل قرش يبص فيه

ما يقلش لآه .. وفين .. ومين

يضرب ينفض فى السليم وعلى الصراط المستقيم

كل اللى يعرف ينطقه

عاش الزعيم

يحيا الزعيم


هم يبكى وهم يضحك

والله طب كانت ذكريات جميلة

خدنا على الغلب وكان بيضحكنا

ونتريق ونفضفض وكان احساس الظلم خلى الناس بتحب بعض وبيجتمعوا على كره واحد

هيييييه يلا سنة الحياة

جميل اااااااااااااااااااااااوي
يسلوا هالايادي يا عروسة البحر