كفاااااااااااااااااااااية

كفاية كدة بالله عليكوا رسالتكوا وصلت .. عايزين اية تانى مبارك لو سابها دلوقتى اقسم بالله العظيم هاتخرب .. تقديرا للضربة الجوية .. ولتلاتين سنة بدون حروب كفاية كدة .. كفاية وارجعوا فكروا هاتنتخبوا مين بعدو .. الراجل قالكوا انوا مش هايرشح نفسة تانى وكلها 6 شهور .. احنا صابرين بقالنا 30 سنة مش هاتقدروا تستنوا 6 شهور كمان .. عايزين البرادعى؟ اللى طول عمرة عايش برةومايعرفش حاجة عنها ؟؟؟؟؟ عايزين الخاين العميل؟؟؟... ولا عايزين حد من الأخوان اللى هايقتلوا فينا مسلمين ومسحيين لو مسكوها ....... ودى رسالة من ام مصرية بتقولكوا : " فكروا بعقلكوا .. هل انتوا بتتعملوا اهاليكوا كدة؟؟ .. قال رسول الله صلى الله علية وسلم :ليس منا من لم يرحم صغيرة ويوقر كبيرة ... خلوا الحياة ترجع طبيعية بقى انتوا حققتوا مطالبكوا .. فى ناس مش لقية تاكل دلوقتى لأنها لسة ماقبضتش مرتبتها ومعاشتها .. ومتسلموش ودانكوا لقناة الجزيرة وغيرها .. دول عايزين يدمرونا ويفرقوا بنا .. انتوا ماتعرفوش انهم عايزين البرادعى يمسكها بأى تمن؟؟ البرادعى واقف من امبارح بيدى كل واحد من اللى بيعارضو الرئيس مبارك 50 جنية ووجبات غدا وعشا لناس اندسوا وسطيكوا عشان يسرقوا اللى عملتوة .. ماتدهومش فرصة لكدة .. البرادعى وامثالة ماصدقوا عشان يركبوا فوق الموجة "



وانا بقولها بملئ فمى ومايهمنيش ان حد يزعل منى "" نعم نعم نعم والف نعم لمبارك""

وانا بردو بقولها ولو مين زعل منى
يسقط يسقط يسقط مبارك
وحسبى الله ونعم الوكيل فى الى عمله والى لسه بيعمله

انا معاك يا مدحت ويا مصطفى فى كل حاجة قولتوها
لازم نحترم انجازات الريس بس يا مصطفى ويا مدحت
انتوا متعرفوش اللى حصل فى ميدان التحرير وال850 جرحى و5 اموات بسبب مظاهرات تأييد الريس مفكرتش هما بيعملوا كدة لوحديهم ولا حد قايلهم انهم يعملوا كدة ولا مفكرتش الدورات اللى بتتعمل فى قطر وهى موسسة امريكية اسرائيلية انهم بيأخدوا البنات والشباب الاحزاب المصرية ويدربوها عشان يؤذوا مصر
ودة طبعا بعلم بعض الوزراء
هتقولى مهو هما خانوا الريس اقولك ان الريس كان بيفتش على كا حاجة بس الايام دى كان بيترك بعض اعمالة لرئيس الوزراء
قى مهمة رئيس الجمهورية انو يترك اشغالة ويتركها لرئيس الوزراء الخاين
وكمان احنا عارفين انو برادعى عميل الامريكان بس احنا لسة مش نعرف الانتخاات هتنتهى على اية
وحاجة اخيرة الوزراء ورئيسهم وبعض رجال الاعمال بيدفعوا فلوس للبلطجية مقابل اخراج المتظاهرين وحلول الاستقرار وكمان الناس اللى كانوا فوق السطح المقابل للمتحف المصرى وميدان التحرير كانوا يلقون عليهم بالكرات النارية واكيد اللى قالهم يعملوا كدة بدفع الفلوس والوجبات الكنتاكى
بعض رجال الاعمال
ودة رأئى انو لو الرئيس مبارك قعد اكتر من كدة البلد هتولع
مع احترامى لجميع ردودكم
تقلو ردى

انزل شوف ماجر ناس فى ميدان التحرير يعملو ايه فى شعبه وانت تعرف

عندما حدث مظاهرات يوم التلاتاء وهو ما يعرف بيوم الغضب
كنت لا اشعر انة لا يواجد مظاهرات فى البلد وتصرفت فى هذا اليوم بشكل عادى وبدءت
دروسى ويومى مثلما افعل فية وجاء يوم الاربعاء وصارت تنتشر الاخبار فى القنوات عن يوم الغضب وقد علمت ان كثيرا من المساجين قد هربوا واصبح ضرب النار يحيط من حولنا ولا نعلم من الذى يقوم بهذا انهم مساجين قد هربوا ولكنهم اجبروا على ذلك مثلما يقول اين ذهبت الشرطة عندما كانت الناس تكاد ان تدخل المتحف واين كانت المطافى عندما الحزب الوطنى وغيرة اشتعل لا تقولوا ان الشرطة قدهربت خوفا من الناس لانهم هم الذين بدأو باطلاق الرصاص عليهم ولكنة امر من الدخلية بانهم يخلوا اماكنهم والفوضى عمت على مصر وقد حرق كثير من الاقسام والسوبر ماركات وكنت لا اعرف لماذا الشرطة لم تقف فى اماكنها ولكننى عرفت الاجابة عقب نزول الجيش المصرى وجاء يوم تالى قد علمت المساجد واصدرت انة من سرق شىء يقوم بوضعة
فى المسجد لان الشرطة قد تقوم بتفتيش المنازل فخافت معظم الناس واستجابوا لما قالة الشيخ فى المسجد وبعد ذلك انشغلنا بما يحدث حولنا ناس من الهاربين يضربون علينا برصاص وكان الشباب والكبار يقفون مع بعضهم جنبا الى جنب واصبحنا خائفين على انفسنا و على اطفالنا ونسهر الليل وننام النهار وانقلبت حياتنا والريس لا يتكلم ولا يتحدث مما يثير غضب الناس وكنت انتظر ان يلقى خطاب وحدث مثلما نتوقع والقى اول خطاب لة وهو انة يعين نائب الا وهو عمرو سليمان والفريق احمد شفيق رئيس الوزراء وعندما حدث ذلك معظم الناس قد فرحت و البعض الاخر قال يسقط الرئيس حسنى مبارك وهاج الشعب مرة اخر ونحن لا يشعر بنا احدا والقى خطاب مرة ثانية وعندما القى هذا الخطاب كنت سعيد واعتقد ان الناس ستغادر ميدان التحرير وظهرت مظاهرات فى الشارع عندنا والشوارع المجاورة فرحا بخطاب الريس وقالوا موعد نزول المظاهرات يوم الاربعاء الساعة التاسعة صباحا ولكن حدث ما لا يكن فى الحسبان وبعد ذلك شاهت التلفاز وكانت تتحدث فتاة عن انة يوجد منظمات بالخارج تقوم بتدريبهم على فعل الاعمال الشاغبة مقابل قدر من المال ومعها كل ما يثبت ذلك وبعد ذلك ظهر رجل يقول انها صحفية وتمثل عليكم ذلك ولا نعلم من يقول الحقيقة ومن يكذب وظهركثير من المصابون فى ميدان التحرير كانوا يلقوا عليهم كرات نارية و على الاسطح يوجد انابيب و قناص وفى البرامج يقول احمد شفيق لن نمس الناس الموجودة فى ميدان التحرير ونصبح نشاهد كثيرا من المصابون فى ميدان التحرير واعتقد انة لا يكون فى صالح حسنى مبارك ولكن تخطر بى عدة اسئلة من الذى سيحكم مصر ويكون جدير بها بعد حسنى مبارك ؟؟؟؟؟؟
ويخطر سوال اخر لما لم يمشى فى الفترة الصغيرة دية لماذا ينتظر وما الذى يرتبة لنا ؟؟؟؟؟؟؟؟ ولن نكر فضلة علينا زمان ولكن كل ما فعلة فى هذة السنوات سيىء جدا ولا تقولوا انة لا يعلم والوزارة اخفت عنة لان كل مننا كبير او صغير يعلم مايحدث لها من نهب وسلب فكيف يكون لا يعلم وهو رئيس دولة
ولا يعلم بشخص مثل احمد عز بما يعملة من نهب و سلب للبلد ولكن لا يتكلم لانة يفعل مثل ما يفعلوا الناس من نهب و سلب ومن اين جاءت لة كثير من الاموال وهو واولادة الذين هربوا وتركوا يواجة مظاهرات وغضب الشعب علية

انا مش بقول ان عصرة كلة ايجابيات فية سلبيات كتير .. انما ماينفعش اننا نعمل اللى عملناة دة .. الراجل قدامة ست شهور فقط فى الحكم .. هو عايز ينهى مسيرتة بشرف .. دة مهما كان لسة رئيس الجمهورية وولى امرنا .. واللى حصل دة ملهاش غير مسمى واحد "قلة ادب" وانا بضم صوتى لصوت مصطفى .. لو حد غلط فى ولى امرى وابويا محمد حسنى مبارك .. انا مش هادخل المنتدى تانى .. ياناس اعملوا اعتبار لحديث الرسول صلى الله علية وسلم " ليس منا من لم يرحم صغيرة ويوقر كبيرة " .. اعملوا اعتبار لثلاثون عاما من السلام .. اعملوا اعتبار لثلاثون عاما من الـلاحرب .. لو مثلا والد حد فيكوا كان ظالم او غلط هايكون رد فعلكوا كدة؟
وبالنسبة للى حصل امبارح .. ايوة الناس اللى عايزين يولعوا فى المتحف قابضين .. بس من مين ؟ قابضين من الناس اللى عايزين يدمروا البلد واثارها وتاريخها من الناس المتربصيين لمصر ومش عايزنها تستقر .. الريس خلاص هايسبها كمان 6 شهور كفاية كدة ياناس حراااااااااااااااااااااااااااام عليكوا

نعم لمبارك وشكرا ياريس

مش معنى الكلام اللى احنا كتبناة انى احنا ضدة ولكن ما مصير الناس اللى فى ميدان التحرير
انا من وجهة نظرى المتواضعة معنديش مانع يكمل 6 شهور اللى خالانى وخلا غيرى يستنى ثلاثين سنة هنقدر نستناة 6 شهور واتمنى انى ميحصلش حاجة للناس اللى فى ميدان التحرير وكفاية خراب واصابات بقى ويا ريت نسيب الناس تشوف اشغالها و مصالحها واحنا كمان نشوف دراستنا



تقبلوا ردى

ملاحظة
لحظت فى كلام مصطفى ومدحت انهم عندهم وجهة نظر واحدة كويس جدا
بس انا زعلت لما انتوا قلتوا انكم هتسيبوا المنتدى لو قالنا كلمة فى حق الريس
انا كنت عايزة اقوال انى كل واحد مننا عندة وجه نظر من حقة يتناقش فيها ويقنع بها من حولة او يقتنع بكلام الاخرين فى النهاية احنا اصدقاء فى منتدى واحد للمناقشة
وكل واحد ممكن يغلط سواء سمع كلمة من هنا ولا هنا تمسك بها من حقنا فى المنتدى ان نصححها لة ونغير فكرتة ولا توثر علينا هذة المناقشات فى الصداقة


شكــــــــــــــــــــــــــــــــــــــــــــــــــــــــــــــــــرا

Nody كتب:

ملاحظة
لحظت فى كلام مصطفى ومدحت انهم عندهم وجهة نظر واحدة كويس جدا
بس انا زعلت لما انتوا قلتوا انكم هتسيبوا المنتدى لو قالنا كلمة فى حق الريس
انا كنت عايزة اقوال انى كل واحد مننا عندة وجه نظر من حقة يتناقش فيها ويقنع بها من حولة او يقتنع بكلام الاخرين فى النهاية احنا اصدقاء فى منتدى واحد للمناقشة
وكل واحد ممكن يغلط سواء سمع كلمة من هنا ولا هنا تمسك بها من حقنا فى المنتدى ان نصححها لة ونغير فكرتة ولا توثر علينا هذة المناقشات فى الصداقة


شكــــــــــــــــــــــــــــــــــــــــــــــــــــــــــــــــــرا

انتى ممكن يكون عندك حق .. بس احنا مضايقيين من الهجوم الفظيع اللى بيتعرض لية
وانا اسف ان كنت انفعلت بس بجد الموضوع زاد اوى عن حدة

لا معندهاش حق اى حاجه ممكن يكون فيها اراء لكن تيجى لحايد الوطن وولى الامر

دى حاجه مفهاش حياديه واحترام اراء سورى ده وطنى ومش مستحمل وانتى لو صاحبك

اضرب بالنار قدامك وسقط قتيل هتعرفى معنى اللى انا فيه

يــــــــــــــــــــــــــــــــــــــــــاه
ده طلع غلبان اوى اوى
ايه الى بتقولوه ده
ده عمرو ما يكون مسلم طب انا عندى اسئلة وتجاوبونى عليها
يوم الجمعة الى هى كانت جمعة الغضب الناس كانت بتصلى فوق الكبرى
وفى البرد ده يرش عليهم مايه وعربيات الحكومه عماله تدوس فيهم
ليه ده اليهود مش بيعملو كده كل ده عشان بيدعو ربنا وبيصلو يعمل كده
واصلا اشمعنا فجأة مبقاش فى حكومه وكلو مشى وعلى فكرة واحد اتصل ع التليفويون
وهو ظابط بس مش ردى يقول اسمه وقال انهم جاتلهم تعليمات بانهم يسيبو الشغل ويلبسو مدنى ويمشو
مين الى عمل كده ها وفى صالح مين وبعدين كل البلطجيه الى فى المساكن دى من الاقسام الى اتفتحت
وعلى فكرة بقى لما المتحف المصرى اتعرض للسرقة الشباب الى كانو فى المظاهرة وطلع منهم اربعة امناء شرطة
حرام ده ولا حلال وقال ايه نعم لمبارك
ربنا ينتقم من مبارك

قال رسول الله صلى الله علية وسلم فى حديث فيما معناة "من قال لاخية انت كافر ردت علية"

ثانيا الريس مش مسؤل عن الضباط اللى سابوا مكاتبهم وهربوا .. دة حبيب العادلى
وهو دلوقتى اتمنع من السفر وارصدتة فى البنوك اتجمدت
ممكن تفهمينى ازاى هو اللى عمل كدة وهو نفسة اللى اعطى تعليمات للوزارة الجديدة بعدم التعامل مع اى من المتظاهريين؟
انتى مالكيش حق انك تتكلمى علية بالإستهتار دة انتى فى عصرة كنتى نايمة فى بيتك ومطمنى على نفسك
انتى قدمتى اية للبلد عشان تستنكرى علية؟ولا اى حاجة غير انك زودتيهم واحدة بتسخر من ولى امرها..اتقى الله

على فكرة عمرى ما كنت متطمنة قد الايام دى
لانى حاسه ان الى جاى احسن
وان شاء الله الى جاى احسن

أكيد اللى جاى احسن ان شاء الله انتى ماجبتيش الديب من ديلة
انتى شوفتى يومين من غير شرطة يوم الجمعة والسبت والحد
كنتى عايشة فى سلام؟اتحداكى
الدنيا كلها كانت فى رعب واللى يقول غير كدة كداااااب
انا كنت فى مظاهرات 25 السلمية .. والناس اللى بيخربوا دول مش مننا .. واحنا اقتنعنا باللى عملة الريس
انا كمان يا مصطفى صديقى اتقتل وهو بيدافع عن بيتة وقدام عينى
وانا واقف عاجز مش عارف اعمل اية .. كل دة نتيجة لغياب الأمن
ومصطفى عندة حق وانا معاة فى كل اللى بيقولة

ياريت بلاش نظرتنا تبقى قصيرة

وانا برضو بتحداكى لو كنتى عايشة فى امان الكام يوم اللى فاتو

انا احترم رأيك بس كل واحد حاسس بنفسه اكتر من اى حد
انا مش عارفة انت مخنوق منى كده ليه كل واحد وأيو

لو انتى كنتى عايشة فى امان .. ملايين غيرك كانوا سهرانين فى الشارع وفى بيوتهم مرعوبيين
بس انا عايز اسألك انتى ساكنة فين؟ عشان اجى اسكن جنبكوا لانة من الواضح ان المنطقة دى امان جدا
الإختلاف فى الرأى لا يفسد للود قضية .. انا بس بتناقش معاكى وياتقنعينى يا أقنعك .. ومابين البايع والشارى يفتح الله

منطقتى لا امان ولا حاجة وبابا واخوا بردو كانو تحت
بس من جوايا ومن الى شوفته فى التحرير
مطمنه جدااااااااااااااااااااااا
وربنا معاهم بكرة

بأذن الله ربنا مش هاينصرهم ومش هايشمت فينا اعدائنا وهاتشوفى

ربنا معاهم وان شاء الله هيمشى بأذن الله
يـــــــــــــــــــــــ يمشى بقى ــــــــــــــــــارب

مدحت بيقول واحد صحبة مات ومصطفى نفس الكلام
مش انتم بس فى كتير جدا ماتوا امام اعينا وغير اللى فى ميدان
التحرير ومعظم الناس بسبب البلطجية اللى هربوا من السجن
حبيب العادلى وغياب النظام الامنى والمفروض تقع عليهم
اشد العقوبات مش تجمد رصيدة فى البنك وبس
انا لو هتكلم على مظاهرة 25 يناير السلمية انا هقول شكرا
للناس اللى طلعت لانها غيرت فى البلد حاجات كتير بس المشكلة
بعد لما الناس السلمية اخذت حقها ومشيت ظهرت ناس وقفا فى التحرير شاغبة
طلبت بسقوط النظام وبعد سقوط النظام اكيد فى طلبات اخر
لان الدول الاخرى هى اللى بتساعد على تفكك مصر وينتهزوا الفرصة ويتدخلوا مصر
باى شكل هو دة اللى هما عايزينة

كل اللى هقولوا ربنا معانا جميعا والازمة دية تعدى على خير

حسبى الله ونعم الوكيل

~Angel~ كتب:

يــــــــــــــــــــــــــــــــــــــــــاه
ده طلع غلبان اوى اوى
ايه الى بتقولوه ده
ده عمرو ما يكون مسلم طب انا عندى اسئلة وتجاوبونى عليها
يوم الجمعة الى هى كانت جمعة الغضب الناس كانت بتصلى فوق الكبرى
وفى البرد ده يرش عليهم مايه وعربيات الحكومه عماله تدوس فيهم
ليه ده اليهود مش بيعملو كده كل ده عشان بيدعو ربنا وبيصلو يعمل كده
واصلا اشمعنا فجأة مبقاش فى حكومه وكلو مشى وعلى فكرة واحد اتصل ع التليفويون
وهو ظابط بس مش ردى يقول اسمه وقال انهم جاتلهم تعليمات بانهم يسيبو الشغل ويلبسو مدنى ويمشو
مين الى عمل كده ها وفى صالح مين وبعدين كل البلطجيه الى فى المساكن دى من الاقسام الى اتفتحت
وعلى فكرة بقى لما المتحف المصرى اتعرض للسرقة الشباب الى كانو فى المظاهرة وطلع منهم اربعة امناء شرطة
حرام ده ولا حلال وقال ايه نعم لمبارك
ربنا ينتقم من مبارك

بصى يا انسه اناهقولك كذا حاجه تخلى بالك منها انتى اول حاجه بتصدقى اى حاجه
زى الشباب الغلابه ثانيا انتى بنت ولا نزلتى مظاهره ولا شفتى اى حاجه وشفتى
صوره هما بيرشوهم بالمياه قلتى خلاص عرفتى الموقف من اولوا لا رحتى شتمه فيهم
ثالت حاجه المسئول عن الكلام ده مش حسنى ده وزير الداخليه ابوس ايديكوا بقى
مش اى حد يتكلم البلد مش ناقصه مش فاهم متكلمش احتفظ براى

انا اظن ان مصطفى قال اللى كنت مش عايز اقولة عشان مازعلش حد منى
انت عندك حق فى كل كلمة قولتها .. مش اى حد مسلم ودانة للجزيرة والعربية يقعد يتكلم زيى البتاع وهو مش فاهم حاجة وعامل زيى البغبغان بيردد اللى بيسمعة
وحسبى الله ونعم الوكيل في اى حد يسعى وراء إشعال الفتنة
انتى مش فاهمة اية اللى بيدبر لمصر من قطر واسرائيل وامريكا بلاش نتخدع وشغلى دماغك شوية البلد هاتخرب لو سابها دلوقتى
الثورة قامت بتغيرات ماكناش نحلم بيها

1- اسقاط حكومه نظيف
2-تعديل المواد الدستوريه الخاصه بالانتخاب ورئيس الجمهوريه
3- تخديد فتره رئاسه الجمهوريه
4-تقديم احمد عز/زهير جرانه/حبيب العادلي الي المحاكمه
5- النظر في طعون مجلس الشعب

وكلنا مع الشباب اللى عمل كدة .. بس اللى بتعملوة دلوقتى خراب
حسبى الله ونعم الوكيل عايزين شعب بدون كرامة وبدون رئيس وتيجى ازاى دى
عايزينة يهرب زيى ناس تانية؟ فوقى احنا مش تونس يامصريين .. احنا افضل منهم بس التطاول على الرؤساء اسمة قلة ادب
بطلوا وارحمونا بقى كل حاجة محتاجة وقت اللى خلاكوا تصبروا السنين دى كلها مش هاتقدروا تصبروا كمان 6 شهور
اتقى الله

يا جماعة الحكاية مش خنا قة ولا حرب دى اراء وكل واحد فى المنتدى لازم يحترم اراء الاخرين
وزى منتا قولت يا اخ مدحت ان اختلاف الرأى لا يفسد للود قضية انت عندك حق
وانت اتعملت مع الموضوع بشكل انفعالى محترم
ولاكن اللى خالانى اتكلم انى اتفاجئت بالى قالو مصطفى
يا مصطفى انا بحترم كل واحد اكبر منى فى المنتدى واصغرو كمان بس يا ريت اننا يا مصطفى نتشاور مع بغضنا وحتى لو كان حد رأية غلط نصححهولوا كل شىء يتاخد بالهداوة مينفعشى نشتم فى بعضنا ونجرح بعضنا وكمان يا مدحت ويا مصطفى صديقكم اللى مات وهو بيدافع عن اهل بيتة المفروض على اد مانتو حزينين عشانوا انكم تفرحوا وبل تحسدوة لانة مات شهيد ومصيرة بأذن اللة الجنة
لازم يا اخوانى واخواتى اننا نحترم اراء بعضنا لاننا اخوة مهما كان حد اراءة غلط لازم نحترمة وبعد كدة نصححلة خلطاطة وانا بحترم كل واحد قال كلمة واتشاور فى الموضوع
تقبلوا ردى المتواضع

اتمنى كل واحد يقرأالصورة دى

يابندق الموضوع دة بالذات مافهوش رأى ورأى اخر .. الموضوع دة فية عادات وتقاليد واصول .. واحنا اصولنا وعاداتنا بتقول اننا ماينفعش ان احنا نغلط فى ولاة امورنا حتى لو غلطوا انما لينا حق الإعتراض بشكل محترم شوية .. وهسأل سؤال هل انت شايف ان الإعتراض دلوقتى على الريس بشكل محترم؟ انا عن نفسى ما أعتقدش

لا بس احنا المفروض نرضى برئاسة الريس ال6 شهور القادمة عشان مفيش دولة تنتهز الفرصة وتدخل مصر ذى ما نودى قالت

يا جماعة كل الى عاوز اقولوا لكل الى عاوز مبارك يتنحى دلوقتى ان الدستور استحالة يتغير لو تنحى يعنى هتكون مطالبهم مش هتتنفذ لكل بعد 8 شهور وتسليم السلطة سلميا هيعدل الدستور ........... وحرام عليكوا بقى يعنى مش كفاية اعدين 30سنة من غير حرب ولا حد يكلمكوا ودلوقتى عاوزينوا يمشى كفاية دمار وخراب فى الشارع يعنى الى مكنش لاقى شغل مش هيلاقى بردوا وكمان الى شغال مش هيلاقى البورصة بتخسر كل يوم ملاييييييييييييين

رسالة إلى كل من يهيننى
لــم أُخـــلــق لِــمـُــعــالــجــة عـــقـــول الـــنـــاس...لــكــنــي أســتــطــيــع...مُـراعــاتـهـم إلـى حــد مــا

يا شباب
هذه مساحة للحوار
ولابد ان نلتزم بآداب الحوار

انت مؤيد .. أنت معارض
هذا رأيك ولك كل الحرية في الدفاع عنه
دافع عنه دون تجريح في شخص الآخرين

المهم في الحوار دة كله
بغض النظر عن الاشخاص هي مصر

هل هانعرف نرجع مصر تانى ؟!!!!

قل ابن حجر رحمه الله الإجماع على عدم جواز الخروج على السلطان الظالم : فقال قال ابن بطال :د((وفى الحديث حجة على ترك الخروج على السلطان ولو جار وقد اجمع الفقهاء على وجوب طاعة السلطان المتغلب والجهاد معه وأن طاعته خير من الخروج عليه لما فى ذلك من حقن الدماء وتسكين الدهماء)) فتح البارى 13/7 ون

حولتوا الحوار لخناقة بينكم بالذمة ده كلام ؟؟؟؟؟
لازم تفكروا شوية قبل ماتكون مؤيد او معارض فكر ف مصلحة بلدك اولا لو مؤيد الريس مش هيلحق يعمل حاجة ف 6 شهور لان البلد ولا 10 او 20 سنة علي بال ما تقف علي رجليها وترجع مكانها صح ثانيا لو معارض مهو لو مشي اللي هييجي مش هيعمل حاجة وهتخرب اكتر احنا اللي بأدينا نصلحها مش اقعد اقول نعم ولا
مبقاش حد عنده قدره انه يستحمل رأي التاني ارحمونا بقي ....

ده رأيي لكل الناس اللي اتكلموا هنا مع احترامي للجميع طبعا بس متنسوش بس اننا كلنا مصريين ومصر اهم من اننا نختلف ف التفاهات دي

يا رومانسى .. انا مش موافق علية لشخصة انما للبلد فقط تقدر تقولى كام واحد هايكون عايز ينط على الكرسى لو مشى دلوقتى؟؟؟؟البلد هاتكون فوضى فى فوضى

هههههههههههههههه
قال يعنى ماكنتش فوضى

يا جماعة فعلا لو في حاجة تحتسب لمبارك هو ان احنا بعيد عن الحرب من سنين محدش فيكم بيشوف اية اللي بيتعمل برة في فلسطين وافغانستان وفي سوال تاني يعني طول السنين دية وهم راضين علي الحال دة وجين دلوقتي يعملوا مظاهرات ؟طب اية اللي جة من المظاهرات دية غير ان البورصة تقع وان الناس تعيش في رعب بسبب خروج المساجين وتعطيل المدارس عن وقت بداها الاصلي كل دة جة علي الشعب كله بالخراب كفاية شهداء الثورة اللي لسة اهلهم بيتحصروا عليهم يا جماعة يا ريت نفكر شوية ومننساش ان احنا كلنا مصريين

انا بشكرك على ردك اولا ياكليوبترا
ثانيا : الثورة جت بفوايد كتير محدش يقدر ينكرها .. زيى انها مثلا اقالت حكومة أحمد نظيف
اللى ماكناش نحلم انها تتشال ولو بعد 30 سنة كمان
وحاجات تانية كتير جدا لايمكن حصرها .. وبالنسبة لللأضرار اللى وقعت على مصر
ياستى نعتبرها "ضريبة الإصلاح"
وطبعا انا معاكى جدا ان اكتر حاجة تحتسب "للرئيس" مبارك اننا بقالنا 30 سنة بدون حروب
وفى عهدة رفعنا العلم المصرى على ارض طابا

~Angel~ كتب:

هههههههههههههههه
قال يعنى ماكنتش فوضى

انا عارف!!!!!! دى طول عمرها فوضى فى فوضى

بس الفوضى درجات يا انسة .. الفوضى اللى كنا فيها السنين اللى فاتت تقارن بالفوضى اللى احنا كنا فيها فى الغياب الأمنى ؟؟ .. انا عن نفسى ما اعتقدش

لأ سورى انا نسيت انك كنتى حاسة بالأمان لما الدنيا كانت بتموت فى بعض
والمساجين كانوا بيطلعوا على الأهالى فى البيوت ويسرقوهم
ويولعوا فى المولات والمحلات التجارية .. وكنتى فى امان كمان لما الدنيا كلها كانت خايفة على نفسها وعلى بعضها .. وكنتى فى امان لما طفل صغير والدة اضرب بالنار ونزل مرعوب من الخوف يشوف جثة والدة
اعذرينى اصل الزهايمر بدأ عندى بدرى حبتين

على اسم التوبيك كفايه يا مدحت لو بتعزنى متكلمش تانى فى الموضوع ده تانى

ومتوجعش دماغك وقفلوا يا جماعه حصل خير كل واحد يخلى معلومته لنفسه

Aswany كتب:

يا شباب
هذه مساحة للحوار
ولابد ان نلتزم بآداب الحوار

انت مؤيد .. أنت معارض
هذا رأيك ولك كل الحرية في الدفاع عنه
دافع عنه دون تجريح في شخص الآخرين

المهم في الحوار دة كله
بغض النظر عن الاشخاص هي مصر

هل هانعرف نرجع مصر تانى ؟!!!!

يامستر حضرتك اكيد متابع زينا كلنا .. احنا والله مش ضدد التغيير بس الى الأحسن

وفى النهاية الوطن باقى والأشخاص زائلون

واكيد طبعا بإذن الله مصر هاتكون احسن من الأول بمراحل بشبابها اللى بيحبوها
واللى مستعدين انهم يفدوا بدمهم تراب البلد دى
ووالله العظيم مش شعارات لأ دى حقيقة