وقع فى ايدى مقاله لمستر اكسيلنت كات(ممتاز القط)
رئيس تحرير الاخبار طبعااااا,,,
وقعت فى ايدى عن طريق الصدفه البحته والله,, وجاتلى كريزة ضحك رهيبه فارجوكوا لو مقدرتوش تضحكوا,, متعيطوش..
هى قديمه شويه من عيد ميلاد الريس.
بس خلوا نفسكوا طويل وكملوا المقاله للاخر
وحاولوا تستوعبوا ان دى مقاله حقيقيه ونزلت فى الاخبار
اه والله حاولوا تصدقوا
وادعولى
_________________
(ياريس كل سنه وأنت طيب وربنا يخليك لينا)
في عيد ميلادك ياريس ندعو الله لك بالعمر المديد(لحد امتى يعنى) لكي تحقق لنا المزيد والمزيد..(اكتر من كده هعيط)
فنحن سيدي الرئيس قدرك وأنت قدرنا
(عايزه حد يعترض على القدر بقى إيه هتكفروا).
لمن غيرك نشكو(ربنا موجود) من مين غيرك نطلب (يا جمال إسلوبك من مين؟؟)
لمن غيرك نروى أحلامنا و آمالنا في مستقبل نملك فيه القدرة على أن نحقق طموحاتنا (فعلا الواحد مش عارف يحقق انهو طموح فيهم يااااااه كتير كتير صراحة)ونترك لأولادنا وأحفادا وطنا عزيزا وقادرا على أن يحقق كل ما يتمناه بصراحة ..
إحنا بنحبك لانك إنسان أصيل ...بتعرف تحافظ على كرامة وكبرياء بلدك وشعبك
(فعلا ده باماره ليبر مان )
بتعرف تقرأ المستقبل صح ياريس(ياماشاء الله)
بنحبك لانك ما بتعملش حاجه إلا بعد ما تحسبها صح ويكون قرارك في الصميم...بنحبك لان تاريخك كله نظيف ابيض..
( فعلا بيستخدم جينرال)
دايما ياريس القرار الغلط في أي مجال يكون له تأثيرات سلبيه بتختلف من مكان لمكان ولكن في الطيران القرار الغلط يعني الموت ومن هنا بيكون فيه تقدير وحسابات كاملة لأي قرار
طول ما إحنا معاك ياريس حسينا بالحكاية دى ..أى حاجه دايما تسبقها دراسة
كاملة..كتير قوى ياريس مواقف مرت علينا وعلى بلدنا..تحديات كتيره لا لها
أول من آخر..لكنك ياريس عدتها بسلام بحنكه ومهارة وتفكير(غنى ياوحيد)
كانت دايما ياريس مصر معاك (للأسف) فى قلبك و عقلك والعدو والحبيب دايما بيحسب لبلدنا معاك الف حساب (اى نعم)
بنحبك ياريس لان سمعة مصر أصبحت معاك زى البرلنت
( اول مره اعرف ان البرلنت حاجه وحشه)
وبيحسدونا عليك لانك دايما ياريس كنت معانا
(بيحسدونى عليك وانت سر عذابى)
ساعا ت كتير كنا بنكلم نفسنا بنقول يا ترى الريس حاسس بينا (هذا هو الموجز واليكم التفاصيل)
يا ترى الريس حاسس بمشاكلنا وهمومنا (تيرارارارااااااااا)
وفى كل مره ياريس نكتشف الحقيقه إنك معانا(هيييييييه)
أنك جزء مننا وإحنا جزء منك ..بتتكلم زينا(معقوله الريس بيعرف يتكلم زينا دا انجاز) وحاسس بالظروف الصعبه اللى إحنا بنعيشها (حتى الريس بيقف فى طابور العيش لا اله الا الله)
بصراحه ياريس ..إحنا نسينا أيام زمان ..أحنا ادلعنا فى عهدك ياريس- (ادلعنا )- ونسينا زمن الاشتراكيه اللى ضحكوا بيه علينا لاننا اكتشفنا إننا بنعيش فى وهم جميل صحينا منه يوم 5 يونيه.(ايوه خلينا فى الاحتكار)
نسينا زمن تليفون العمده وبقينا دلوقتى محتارين نركب 012 ولا 010 ولا 011 ( يا لفظاعة الانجازات)
نسينا القطارات ماركة اللى يحب النبى يزق
( ايوه تطورنا بقى فيه قطارات بتولع وتخرج عن من على القضبان)
نسينا زمن كل حاجه بالبطاقه من قطن العرايس لحد قماش التيل والبفته والدبلان
دلوقتى مش هتجيب حاجه لا ببطاقه ولا بغيرها
نسينا زمن المجارى اللى طافحة وطلمبات الميه البحارى
(احمدو ربنا باه مبتشربوش ميه بالمجارى شعب مبيطمرش فيه)
دلوقتى كله بيتكلم مفيش حد خايف شلت الخوف من قلوبنا ياريس
(ايوه ومفيش بنات اتمسكت فى اضراب
6 ابريل دى كلها اوشاعات مغرضه)
بنحبك ياريس لأنك مننا انت الرئيس اللى بتقله فى الغرف المغلقه هو اللى
بتقوله فى العلن ودايما افكارك سباقه والعالم كله يا ريس قد ايه بيحترمك
وحبك لينا خلانا
نطمع اكتر واكتر ياريس؟
(خلانا شعب اخييييه طمااع مش كفايه بياكل حب ويتعشى حب)
فى عيد ميلادك الناس ..اهلك ..وشعبك ..كل اللى بيحبوك المفروض يقدمولك ورود الدنيا كلها (تيرررررررررا)
و العلاوه ياريس كانت مفاجاه كانت عبور بالموظفين الغلابه من الدوامه اللى عايشينها ليل نهار
(ايوه ايوه على يدى اصرفوا العلاوه ولموها انتو بعد كده يبطريقتكو)
الناس كلها ياريس بتقولك فى عيد ميلادك كتر خيرك وربنا يديك الصحه والسنه الجايه فى سنه جايه(هو فى سنه جايه)
برضه هنقولك علاوه ياريس ..
ريس له فى قلب كل مصرى حب ما يتقدرش باموال الدنيا كلها (اهىء اهىء اهىء هعيط)
ومصر معاك بخير ياريس ونفضل دايما نقولك عايزين
(ايييييييه شعب مبيحمدش ربنا)
كل سنه وانت بكل خير ياريس
****************
ها لسه عايشين ولا بتضحكوا ولا بتعيطوا؟؟
فى ناس كده؟؟؟؟ وعينى عينك كده؟؟؟
فى نفاااااااااااااااااااااااااق كده
دا سمير رجب واحمد نافع مكانوش بيعملوا كده يامؤمن.
عمركوا شفتو كده؟؟؟؟