نصايح لبنات وشباب المنتدى لازم تشوفوا اللى بيحصل

هو: أنا عايز اقولك على سر شلته فى قلبى سنين
هى: قول مالك؟
هو: أنا بحبك وانتى عمرى وبحلم بيكى كل ليلة 7 مرات ونص وبصحى على صوتك ياحياتى
هى: وأنا كمان ياحبيبى بحبك بقالى 3 شهور و5تيام و6ساعات وربع
هو: صحيح؟ يااااااااااه ...ده احلى يوم فى حياتى
هى: وأنا كمان..بس هنعمل ايه؟ واهلى واهلك والدنيا والناس؟
هو: هحبك وتحبينى ياعمرى وكفاية نبقى سوا
هى: طب ياحبيبى أنا بقول كده برضه بس مانطولش فى الحكاية ماشى؟

*فاتت سنة غرام وهيام وأحلى كلام.........

هى: احنا هنفضل كده كتير ياحبيبى واهلينا مايعرفوش؟
هو: ليه ياحبيبتى أنا بسش اظبط نفسى فى الشغل واجى اتقدملك على طوووووووول
هى: امتى بقى يحصل ده؟....يااااه ده أنا هبقى أحلى كركوبة فى الدنيا
هو: قريب ياحبيبتى قريب كلها 12 سنه بالكتير

*فاتت كمان سنة وهو ولا هنا وهى هتطق من الغيظ......

هى: حبيبى الحكاية طولت اوى احنا هنفضل كده كتير؟ -تعبت قلبى الله يحرقك-
هو: كده ازاى ياحبيبتى؟ مااحنا اشطه اهو وآخر تمام
هى: تمام ايه وهمام ايه؟ هو احنا هنفضل تحت شجرة الجرجير ومقضيينها عصير لمون؟
هو: تقصدى ايه ياروحى؟ اصبرى بكره يبقى عندنا بيت وأولاد
هى: ده عند أمه ياادهم ... أنا متقدملى عريس كويس وإذا مالحقتنيش هيخطفونى منك
هو: لاااااااااا ده أنا كنت ارمى نفسى من فوق المكتب الى فى الشغل...ده انا كنت اقطع شرايينى
هى: لأ انا مش عايزاك تعمل كده أنا هكلم بابا وماما وانت تاخد خطوة بقى

*أسبوع...اتنين...تلاته.تليفونه غير متاح...مابيردش ....وأما رد....

هى: انت فين مش لاقياك؟
هو: معلش تليفونى كان فاصل شحن وكنت بشحنه
هى: بقاله شهر فاصل شحن وبتشحنه؟! ليه انت كنت بتشحنه غاز؟
هو: خلصنا بقى..قصرى ..خير؟
هى: وهييجى منين الخير ياروحى وانت مانفذتش اللى اتفقنا عليه؟
هو: هو احنا اتفقنا على حاجه؟!
هى: نعم ياروح أمك؟ امال تقطيع شرايينك واوردتك وشرب مية النار ده كان ليه؟
هو: كنت مجنون وعقلت ياروحى..وخطبت البت ماهيتاب بنت عمى الجمعة اللى فاتت الساعة اتناشر وخمسه الضهر
هى: ياواطى ياندل....ماهيتاب؟!!!! طب وأنا؟
هو: ماتغلطيش بس وانسى الجرجير واللمون...انتى مش فاهمه حاجة
هى: انسى؟ ده اخر كلام عندك؟..اصلى مش ناوية افهم
هو: اه ياروحى...بس صدقينى انتى أكتر حاجة حبيتها فى حياتى حتى اكتر من المكرونه البشاميل...لكن أهلى قالولى إما ماهيتاب أو الطرد من البيت
هى: اوك..اشطه يامان...سى يو...باى

الخلاصة

- مابنى على باطل فهو باطل

- كلمة بحبك بقت اسهل كلمة بتتقال واسهل كلمة بتتنسى

معاك حق بس انا عايزه اعرف ليه بقينا كده مافيش حد بيوعد ويوفى؟

فعلا مافيش حد بيوعد ويوفى
مافيش كلام يتقال

عندك حق
احنا لازم نتوقع الخيانه من اي حد
عشان بقت اسهل من اسهل حاجه في الدنيا

فعلا جميعك عندك حق

عندك حق كلامك صح كل الى يوعد لازم يوفى

مش بيقولوا برضو وعد الحر دين عليه فى الاخر
اللى هيتحاسب اللى مش يوفى الوعد

صح NOURA

حتة قصة جامدة طحن..................شكرا

قصة جميلة ويا ريت كل البنات يستفادوا منها

والله عندك حق وقصة جميلة جدااااااا
وفيها نصايح كتير

قصة جميلة وبتحصل ولكن بعض البنات عارفة ده وانهم بيتسالو وبيعرفوا شباب وهم عارفين اني ده كذب...
معلش انا اكلمت كتير بس هو ده اللي بسمعه...

بس مش كلوه كدا تحت شجرة الجرير فى ناس ربنا معاهم

بس لازم منصدقش احد بسهولة ونتأكد من الناس حتي لا نقع في خطأ.

بص يا درش أولا "الإختلاف فى الرأى لايفسد فى الود قضية"

مش كل اللى بيوعد مش بيوفى

ولا كل اللى بيقول كلمة " بحبك " بيكون مش قاصدها

انا قرأت فى كتاب قبل كدة انة "من يقول لأحد كلمة بحبك فإنة يرفع من شأنة

لو كان صادقا" واللى يحس الكلمة دى صادقة ولا لأ اللى وجهت لية

و أذكرك " الإختلاف فى الرأى لا يفسد فى الود قضية"

اولا انا عاوزة بس اقول كومنت تانى
قلبنا دا عامل زى بيت ولة باب مش اى حد يخبط وعاوز يدخل ندخلوة نشوف من العين مين البرة ونعرف هو عاوز اية مهما كان دة حد مش نعرفو
تانى حاجة الكلمة دى بقت سهلة اوى فى الزمن دة ولازم حد يستفيد من اخطاءو واخطاء الناس الى معاة
تالت حاجة مافيش حاجة اسمها حب فى فترة المراهقة او فى السن الصغنونى فى الفترة دى بتكون اعجاب مش اكتر
والناس انواع والمنطق بيقول كدة فى منهم الى بيوفى بوعدو وفى منهم الى .....
بس مش ينفع لام عاطفتنا وقلبنا اكتر عقلنا موجود لازم نكون متزنين

تالت حاجة مافيش حاجة اسمها حب فى فترة المراهقة او فى السن الصغنونى فى الفترة دى بتكون اعجاب مش اكتر ......

انا مش متفق معاكى يا جيسكا فى الحته دى عشان كتير كانوا بيحب بعض من وهما صغيرين

وكبروا ووعدوا بعض انهم ميفترقوش وبتنتهى بالزواج وكثيرا يحدث ذلك مع الاقارب

اوك بس بتحصل بس مع الاقارب انما برة لاءة

والله برة القرابة بتحصل بردة مش شرط يعنى يكونوا قرايب بس،،،أنا أعرف ناس كانوا جران وكانوا بيحبوا بعض

من صغرهم و هم دلوقتى مخطوبيين وبيحبوا بعض جدا

اهم حاجه الطرفين يكونوا عارفين قيمه الكلمه السهله ديه
لان سبب الارتباط هوه الكلمه ديه
3حروف بس بيعموا معجراااااااااااااااااااااات

كلمة بحبك ديه بقت سهله اوى اى حدممكن يقولها
ممكن يتضحك بيها على بنت و البت تصدقها وبكل نيه واخلاص بتعمله
بس هو مش عندة دم ومش بيحس بكل سهوله يسبها وميكلمهاش تانى
انا كنت اعرف بنت كانت بتحب واحد وهو طلب منها ان هما يخرجوا مع بعض
بس هى رفضت تخرج معاه من مورا اهلها وقالتوا انا مش اعمل كدة من وارا اهلى
واتارى كل وقت دة بتضحك عليها وهى علشان طيبة صدقته وحبتة
بس هو ماقدرشى الحب دة وكان عايز يتسلى كام يوم ويسبها ويدور على واحدة تانية
والبنت ديه دلوقتى متعذبه جدا لانها اول واحد تحبه بجد وهى مش عارفة تنساه خالص عملت المستحيل علشان تكلمة وهو ماعندوش دم
معلشى طولت عليكم شويه

فعلا معندوش دم بس ممكن يكون عند عذر بردوا منظلموش

عذر ايه الى يخليه يعمل كدة فيها دة حتى ماحولش يفهمها الى فيه مضايق من ايه
محاولشى يكلهما وهى كانت تتصل بية وتبعت رسايل
هو ماكنت بيتصل بيها ومش بيرد
عذر ايه ونبى بس
هو كان شكله بيضحك مش الى مضايقنى ان البنت حبتة اوى

{صعب أن تحب شخصا لا يحبك
الأصعب أن تستمر في حبه رغم عدم إحساسه بك}
طبعاُ صعب يا جم ...........................

بس انا بسال ليه الخيانه مدام مش بيحبها
مكنش حبها من الاول وطبعاُ اللي كانت بتحبه هتعمل ايه هيا مصدومه
واكيد هيا كانت بتحب بجد .............
واكيد ها عندها حق في اللي هيا كانت بتقوله

انا اسف اني طولت عليكم

نصايح جميله جدا وياريت البنات والشباب يستفادو منها

mustafa.sharf كتب:

الخلاصة

- مابنى على باطل فهو باطل

- كلمة بحبك بقت اسهل كلمة بتتقال واسهل كلمة بتتنسى

دى الرساله اللى انا عاوز اوصلها مش اكتر

وياريت الواحد ميعملش موضوع وفى الاخر نخرج عن الموضوع خالص

ويقلب الموضوع شات

موضوع جميل بس انا من راى ان مش اى كلمه تتقال لازم نصدقها الا لما اللى قدامك يسبتها بكل صدق واخلاص واكيد مش كل الناس بتنخدع ولازم الواحد يتعلم من اخطاءه