مين اللى قال اللى فات مات؟ قصه جميله جدااا

دي قصه جامده جدا وعجبتني اوي ويارب تعجبكم

وهقدمها علي حلقات




هي طويله شويه بس بجد حلوه

اتمنى ان تستمتعوا بها
تحياتى

الابطال:
ندى وشادي جيران
القصة بتبتدي والابطال لسه صغيرين ندى في اولى ثانوي وشادي في تالتة ثانوي.




الفصل الاول

الحلقه الاولى




دخلت الام الغرفة وقالتت لابنتها في هدوء.




الام: ندى ,يلا روحي اعملي قهوة لباباكي, واسأليهم لو عايزين عصير.

قامت ندى من على مكتبها في تأفف, وهي تقول.

ندى: يووووه ياماما, متخلي نسمة هي الي تعملها, انتي مش شايفاني بذاكر.

الام: بطلي دلع , دلوقتي بقيتي بتذاكري؟, وخلى نسمة الي تطلع! , وبعدين نسمة مبتعرفش تعمل قهوة.

ندى: حاضر خلاص, هقوم اهه, هو مين برة اصلا؟.

الام: محدش غريب يعني, دي هالة اختك وهايدي صاحبتها وشادي.

ندى: شادي مين؟.

الام: شادي الي ساكن في البرج الاحمر الي قدامنا, مش عارفاه؟ .

ندى: اه ,اه فاكراه , الواد الغلس القصير دا, الي كان بيغلس عليا واحنا صغيرين ,دا كان شعره طويل وكنت دايما اشده منه,ايه دا هو بقى في تالتة ثانوي امتى؟, هو قد هالة؟.

الام: ايوة, قدها .

ندى: وايه الي جايبة النهاردة؟.

الام: ماهو كمان مقدم على اختبار القدرات بتاع عمارة, فجاي لباباكي يفهمه بالمرة مع هالة وهايدي.

ندى: الواد انا فاكراه ,دا كان رذل رذالة يا ماما واحنا صغيرين, مع اني اصغر منه بسنتين بس كنت اطول منه , وكنت دايما بضربه.

الام: انتي هتقفي ترغي عشان تضيعي الوقت, اتفضلي يلا, روحي اعملي القهوة, وطلعيلهم عصير, وبعد كدة, هاتيلي انا كمان عصير واسألي نسمة لو عايزة.

ندى: يووووه, حاضر, ماهي نسمة دي الاعدادية بتاعتها هتيجي فوق دماغي, منا في اولى ثانوي برضة وعندي اربعتاشر مادة.




.

الام: طب اعملي الي قلتلك عليه بسرعة, وانتي تلحقي تذاكري الاربعتاشر مادة يا لمضة.

ندى: حاضر.

وتوجهت الى المطبخ على مضض, وجهزت القهوة, وهي تدندن, ووضعتها على صينية واتجهت بها حيث ابوها.

ندى: بابا , القهوة.

الاب: شكرا يا نيدو.

اخذ والدها القهوة من يديها , بينما التفتت هي تسأل.

ندى: حد عايز عصير؟.

نظرت اليها اختها .

هالة: انا عايزة, وهاتي لهايدي كمان, عايز يا شادي؟.

التفتت ندى تنظر لشادي لاول مرة, واندهشت, انه لم يعد الطفل القصير الذي اعتادت ان تضربه, لقد رأت شابا طويلا بشدة, يرتدي نظارة طبية, ذو وجه وسيم اسمر, فتعجبت, وقالت دون ان تفكر.

ندى: ايه دااااا, انت طولت اوي كده ليه, دانت كنت ازعة, وشعرك...

قال الاب ينهرها.

الاب: ايه يا ندى الكلام دا؟, مش تفكري في الكلام قبل ماتقوليه.

ندى: اصله يا بابا انا مشفتوش من واحنا صغيرين, كان قصير وشعره منكوش و....

قاطعها الاب للمرة الثانية ,بينما شعر شادي بالحرج من الوصف حين انخرطتا هالة وهايدي في الضحك.

الاب: فيه بنت رقيقة تتكلم زي الدبش كده, جيبيلهم عصير يلا وتعالي, وبطلي تلبيخ.

فشعرت هي بالحرج هذه المرة, وذهبت لتفعل مثلما قال لها ابوها في سرعة ثم عادت لامها .

ندى: ماما , ماما انتي شفتي شادي؟؟.

الام: ايوة يا حبيبتي.

ندى: دا بقى شكل تاني خالص يا ماما, دا طول اوي ولبس نضارة.

الام: مانتي عندك حق, مشفتيهوش من زمان, والله مااعرف كان مختفي فين كل دا.

ندى: بس انا لبخت الدنيا ,واتريأت عليه قدامهم.

الام: انتي على طول لسانك فالت, لما يخلصوا ابقى اطلعي اعتذريله.

صمتت قليلا تفكر ثم قالت.

ندى: هو اكيد علمي رياضة ,ولا ايه؟, هيكون بياخد قدرات عمارة ليه يعني؟.

الام: معرفش انا بقى, انتي مش هتعدي تذاكري ولا ايه؟, وبعدين فين العصير بتاعي.

ندى: اه صحيح نسيت.

وانطلقت تحضره في سرعة ,وهي تفكر في شكل شادي الذي تغير تماما منذ الصغر.

يا جماعه دول اول فصلين فى القصه هيا اى نعم طويله شويه بس جميله جدا لو الفصلين دول عجبوكوا هكملها وانا مستنى ردودكوا

هى من الاول مضحكهى جدا فى إنتظار التكمله

بس بصراحه البنت فظيعه جدا جدا

شكر يا باربى وانشاء الله هكمل الباقى بس لما الباقى يشوفوا اول فصلين وهى والهى قصه جمييييييييييله جدا والهى

انتظرت ندى بصبر انتهاء والدها من الحديث مع اختها وهايدي وشادي, ودخوله غرفته لتهرع للخارج, موقفة شادي وهو في طريقه الي الباب.

ندى: شادي.

التفت ينظر اليها في دهشة, بينما نظرت هي لاعلى لتنظر لوجهه, الذي علته امارات التساؤل.

شادي: ايوة , فيه حاجة؟.

ندى: انا.... سوري,...سوري لو كنت ضايقتك ولا حاجة.

نظر اليها ببرود.

شادي: ضايقتيني في ايه؟.

ارتبكت ندى لبروده , وشعرت هي بالاحراج.

ندى: يعني لما قلت انك كنت ...قصير وشعرك طويل.

قال ببرود وهو ينظر الى اختها وصديقتها, اللتان تتابعان الحديث في شغف.

شادي: طب منا كنت قصير وشعري طويل , ايه يعني؟.

نظرت اليه بدهشة, ثم بضيق.

ندى:يعني ان انا قلت كده.

شادي: اصلا انا مكنتش قصير انتي الي كنتي طويلة زيادة وانتي صغيرة, وكنتي مستقوية نفسك, عشان طولك.

شعت بالغضب, فقالت في انفعال.

ندى: تصدق انت بارد, وانا غلطانة اني جيت اتأسفلك اصلا, انت فعلا كنت قصير ومنكوش, ومش كده وبس, كنت غلس وكنت دايما بضربك,هه بقى.

وضربت بقدمها في الارض بطفولية, ثم اندفعت للداخل, بينما ازداد هو احراجا امام الفتاتين.

ندى: بس يا هالة متكلمنيش عنه, دا قليل الزوق, وغبي.

ضحكت هالة وهي تقول.

هالة: مش انتي الي هزأتيه الاول, واتريأتي عليه ولا لأ؟.

ندى: انا مقلتش حاجة غلط, هو كان غلس, ولسه غلس زي ماهو, هو عشان بقى نخلة خلاص, نسي شكله زمان, انا فاكرة اننا عندنا صور ليه وهو حاطط صباعه في مناخيره كمان.

انخرطت هالة في الضحك وهي تقول.

هالة: بس متقوليش الكلام دا ادام هايدي لحسن معجبة بيه, وشكلهم هيظبطو كده.

ندى: يتحرقو هما الاتنين, اهي هي رخمة زيه بالظبط, وهو وحش واسمر وبنضارة.

هالة: حرام عليكي, دا وشه امور, انتي مخدتيش بالك ولا ايه.

ندى: وانا اخد بالي ليه, مانتي عارفة اني بحب الصبيان البيض الي عنيهم ملونة.

وصمتتا قليلا ثم قالت هالة بشغف.

هالة: بس هي صحيح فين الصورة دي اوريهالها.

ضحكت ندى وهي تقوم.

ندى: قومي قومي, ندور في البوم الصور.




تابع

تباطئت خطوات ندى السريعة, وهي تتوجه نحو المصعد بمدخل بيتها, بعد ان كانت مندفعة كعادتها باتجاهه عائدة من درسها, مستوقفة الراكب قبل ان يدخل ويغلق الباب , ولكنها تعرفته, انه شادي ,فتراجعت قليلا عن سرعتها, فالتفت شادي ينظر اليها , وتردد قليلا قبل ان يفتح الباب لها يدعوها للدخول قبله, فترددت هي الاخرى وهي تقول.

ندى: خلاص اطلع انت

قال بسخرية مشوبة ببعض الحرج.

شادي: هو حمولة واحد بس ولا ايه؟, اركبي دا حتى بتاع بيتكو انتو.

دخلت وهي تشعر بالحرج, فقد علمت انه علم بأمر الصورة التي أرتها لهايدي صديقته, وعلمت انها وهالة سخرتا منه في الحصة الماضية, وكانت قد تجنبت رؤيته قدر الامكان بعد هذا الامر.

شادي: كيميا وفيزيا؟.

التفتت اليه بدهشة.

ندى: نعم؟.
اشار الى المذكرة بيدها.
شادي: كيميا وفيزيا, اولى ثانوي طبعا.
ندى: الملزمة ,دي؟, اه.
شادي : صعبين ولا؟.
ندى: زفت.
شادي: ميجوش حاجة في كيميا تانية ولا الفيزيا.
ندى: ربنا يطمنك.

شادي: ناوية ادبي ولا علمي؟.
ندى: معرفش لسه.
صمتا قليلا ,قبل ان يقول بجدية مفاجئة.
شادي: انا كمان عندي صور ليكي وانتي صغيرة على فكرة.
احمر وجهها لانه فتح هذا الموضوع في وسط كلام عادي , وقالت بحرج.
ندى: صور ايه؟.
اكمل دون ان يجب.
شادي: ومكانش شكلك فيهم حلو برضة,بس انا مش عيل زيك عشان اردهالك.
رفعت عينيها اليه في دهشة وحرج, وعجزت عن الكلام, بينما توقف المصعد, فقال وهو يخرج منه.
شادي: مع ان شكلك ذكية, بس تصرفات العيال دي بتغطي على ذكائك.

خرج في هدوء, وتوجه الي باب بيتها تاركا اياها في قمة الحرج, وهي تتبعه في بطء, تفكر فيما قاله لها ,وشعرت بالدم يفور في جسدها, وبالرغبة بشدة في الرد عليه, ولكنها لم تدر بم تجب, فأمها فتحت الباب مرحبة به, وادخلته.

ــــــــــــــــــ

مضت الايام بعد هذه المواجهة مع شادي على ندى عادية, في باديء الامر كانت مغتاظة وترغب في الانتقام بشدة, ثم بعد هذا نست او تناست الامر , لان الامتحانات شغلتها , ولم تتواجه بشادي بعدها اذ تجنبت حرج اللقاء, وعلمت بعد هذا ان هايدي لم تضيع وقتها وارتبطت به لانها معجبة به منذ زمن, ولم يكن مزاحها عليه في هذا اليوم الا لمجرد لفت انتباهه.
ندى: وهي هايدي بتحبه بجد؟. قالت هالة وهي تجلس على سريرها بغرفتهما, بعد ان اطفأت الضوء.
هالة: معرفش, هي بتقول كده, بس انتي عارفة هايدي بتحب على نفسها اصلا, اصله طلع مؤدب اوي, تصدقي ان دي اول مرة يصاحب يا نيدو؟, دي غلبت على ما خلته ينطق.
ندى: ياسلام؟.
هالة: انتي مخدتيش بالك ولا ايه؟, دا واد دحيح, دا هيدخل هندسة ان شاء الله من اوسع الابواب, مش زينا عنينا طلعت في المذاكرة, لولا ان بابا واعدني بهدية لو دخلت هندسة زيه مكنتش ذاكرت اوي كده.
ندى: امال مش باين عليه يعني.
هالة: حرام عليكي دا باين عليه جدا, انا كنت فاكراه الاول تقيل, لانه حلو شايف نفسه وكده , بس طلع من العيال الي بيذاكرو ومش في دماغهم, دا عمرو قالي انه كان خنيق.
ندى: هو كان في مدرسة عمرو؟.
هالة: لا , بس كان عارفه من اصحابه, يا بنتي عمرو اكبر منه.
ندى: منا فاهمة, الا صحيح هو منزلش اجازة الاسبوع دا؟.
هالة: لا ياستي, شعره طويل شوية, اتحبس الخميس دا.
ندى: خليكي انتي اعدي صدقيه, تلاقيه نزل اجازة ومقالكيش زي المرة الي فاتت.
هالة: لا انا سألت حجازي الي في سنة تالتة, قالي انه منزلش الاسبوع دا, وباعت معاه كمان ورقة طلبات هيجيبهاله هو

شدت ندى الغطاء عليها في حدة وهي توليها ظهرها.
ندى: خليكي اعدي استنيه اسبوع ورا اسبوع.
هالة: انا مش فاهمة انتي مبتحبيهوش ليه؟.
ندى: انا الي مش عارفة انتي بتحبيه على ايه, دا لا شكل ولا منظر, ايه يعني ظابط؟ .
هالة: انتي غيرانة عشانه بيحبني جدا, وعشان عاجب ماما, واول ما يتخرج هيجي يخطبني.
التفتت تنظر اليها في غضب.
ندى: ماتحبيه ولا يحبك, انتي حرة, اتفلقي, بس الواد دا انا بقى بسمع عنه بلاوي في المدرسة عندنا, وانتي حرة .
هالة: مالكيش دعوة , انا مش كل ما اكلمك تقوليلي البقين دول,

خلي نصايحك لنفسك

ووضعت الوسادة فوق رأسها في عنف وهي تغلق ضوء الاباجورة.

ــــــــــــــــــــــ


وقفت ندى مع اختها تتململ وهي متوقفة مع شادي امام البيت يتحدثان.
شادي: وهتقدمي الورق امتى.
هالة: لسه هحط الرغبات بس اكيد ان شاء الله هندسات كلها الاول ,وبعدها فنون جميلة, امال تعبنا قلبنا في القدرات ليه.
شادي: ربنا يسهل, لما تيجي تودي الورق ابقي قوليلي نروح سوا.
هالة: دي هايدي الي زعلانة اوي عشان مجموعها, شكلها مش هتحصل هندسة.
شادي: ممممم, منا عارف.
هالة: ايه مالك؟, انتو متخانقين ولا ايه؟.
شادي : لا عادي.
شعرت ندى بالملل, فتأففت وهي تقول.
ندى: يلا بقى يا هالة.
شادي: طيب انا همشي عشان متتأخروش, سلميلي على انكل وطنط, باي يا ندى.
قالت بعد انصرافه.
ندى: الواد دا رخم بشكل

الباقى فيما بعد بس يا ريت اعرف رايكم لحايد دلوقتى ده لسه هيحصل حاجات جامده جدااا.....

بجد جميله جد
ا جايبها منين


يلا بسرعه لو سمحت بسرعه

وشكرا على القصه

الحلقة الثالثة



هايدي: بارد يا هالة بارد, مبيحسش ولا بيتقل انا مش فاهمة, مش حاسس بيا خالص, من ساعة ما عرف انه هيقبل في هندسة وانا لا خلااااص, قالبني.
تمتمت ندى وهي جالسة على سريرها المقابل لسرير اختها ,تقلب مجلة في يديها .
ندى: انا شايفة ان من قبل ما يقبل كمان.
نظرت هالة اليها بغيظ لتسكت, في حين لم تنتبه هايدي لنبرة السخرية في صوتها.
هايدي: دانا الي على طول بسأل وبكلمه وعايزة انزل اشوفه, وهو مفيش سؤال ولا اهتمام ولا حاجة خالص, ليه كده؟, حاولت اكلمه امبارح واقوله, انت يا بني خليك معايا شوية,زعل مني
هالة: ياستي يمكن هو كده.
هايدي: طيب ما تسأليه يا لولو, اعرفيلي ماله, انا حاسة انه بيحب واحدة تانية.
تمتمت ندى للمرة الثانية.
ندى: او مبيحبكيش انتي.
نهرتها اختها.
هالة: وبعدين بقى يا ندى.
دفنت ندى وجهها في المجلة وهي تضحك بغير صوت.
هايدي: بصي انتي كلميه بينك وبينه كده, واسأليه.
هالة: لا ياستي انا ماليش دعوة.
هايدي: عشان خاطري.
هالة: والله ما ينفع, انا مش واخدة عليه اوي, وبعدين عمرو يزعقلي.
فالتفتت الى ندى.
هايدي: طب ماتكلميه انتي يا ندى.
اعتدلت ندى وهي تترك المجلة من يديها.
ندى: انا؟.
هايدي: اه , كلميه عادي, انتو عارفينه من زمان, اسأليه , قوليله انا بحس انك مش مهتم بهايدي وكدة.
ندى: اكلمه, دا واد....


وابتلعت كلمة " غلس" بغتة تحت نظرات هايدي الراجية, ثم قالت.
ندى: ماشي, هكلمه حاضر, هاتي نمرة موبايله.

ــــــــــــــ
شعرت ندى بالحرج وهي تتصل بشادي تليفونيا بينما هايدي وهالة جالستان بجانبها , ينتظرانها ان تنطق, وعينا هايدي معلقتان بشفتيها.
ندى: الو, ازيك يا شادي,.....انا ندى اخت هالة.
شادي: ندى؟, اه ازيك ياندى ,عاملة ايه؟.
ندى: الحمد لله, انت اخبارك ايه؟.
شادي: تمام,....؟؟؟.

شادي: تمام,....؟؟؟.
نظرت بطرف عينيها للفتاتين الجالستين امامها تترقبان في قلق, ثم قالت.
ندى: انا كنت عايزاك في موضوع كده.
شادي: تحت امرك.
ندى: بصراحة,... يعني , انا شفت,... يعني سمعت هايدي بتكلم هالة عن انكو اتخانقتو كده باين!!. شادي: مممم.
ندى: يعني بصراحة هي كانت زعلانة اوي, فأنا قلت اكلمك اشوف فيه ايه؟, لو فيه حاجة ممكن اقدر انا اعملها.
شادي: ممم , يعني مش هي الي باعتاكي تتكلمي؟.
نظرت الي هايدي في ذعر وهي تقول.
ندى: لا, لا طبعا مش هي الي باعتاني اتكلم.
فوضعت هايدي كفها على فمها , وهي تشير لها بيدها نفيا, وهمست.
هايدي: اوعي.
شادي: طيب, هي هايدي دي صاحبتك اوي كده يعني؟.
تعجبت ندى للسؤال.
ندى: مش... اوي

شادي: طيب ,..نصيحة مني, احسنلك متصاحبيهاش.
احمر وجهها في ذعر وهي تنظر لهايدي التي اشارت بيدها متسائلة.
هايدي: بيقول ايه؟.
فأشارت لها ندى بيدها ان تصمت , وقالت بحذر.
ندى: ليه كده؟.
شادي: يعني انتي واختك بنات محترمة ومش دي الي تبقى صاحبتكو, دا كلام من اخ بيعزكو يعني. ندى: ليه كده برضة؟.
شادي: بصراحة كدة هي بنت مدلوقة اوي, وفري شوية, ومبتقولش لأ لاي حاجة.
ندى: ازاي؟.
شادي: يعني جريئة وهي الي جت تكلمني, وبعدها لزقت لزقة غريبة, كل يومين الاقيها جيالي تحت البيت, و على طول مكالمات, بشوفها صدفة في كل حتة, كأنها بتبقى مستنياني, وبعدين ليها اصحاب ولاد كتير اوي, ومسمعتش منهم كلام كويس عنها, لو تقدري بجد ابعدي عنها.
دهشت ندى من الكلام, ونظرت الى هايدي بتعجب, فهمست هايدي.
هايدي: فيه ايه؟, بيقول ايه؟.
فقالت لها هالة.
هالة: يا ابنتي اسكتي هيسمعك.
فعلا صوت همهماتهما وسمعه شادي, فقالت ندى وهي تشيح بيدها لهما في تحذير. ندى: يعني ايه؟.
شادي: انتي مش عارفة تتكلمي ولا ايه؟,..... حد جمبك؟.
قالت في سرعة مرتبكة.
ندى: لا مفيش.
انصت شادي قليلا , بينما اشارت هي لهما لتصمتا.
شادي: لا ....فيه, لو هايدي هي الي جمبك, قوليلها تبطل حركات العيال دي, ولو عايزة تقولي حاجة تقولهالي بنفسها, مش تبعتلي مراسيل, وعايزة توصليلها الي انا قلته عليها وصليهولها, انا مش هخاف منك ولا منها.
ندى: مفيش حد جمبي صدقني, هايدي مش جمبي.
اتسعت عينا هايدي في ذعر, فهمست هالة.
هالة: مش قلتلك هيسمعك.
شادي: مش مهم, بس فكري في الي قلتهولك كويس يا ندى, انتي بنت كويسة, وهي لو صاحبة اختك مش شرط تبقى صاحبتك انتي كمان. قالت ندى في استسلام.
ندى: حاضر, ماشي يا شادي عايز حاجة؟.
شادي: لا يا ندى, خدي بالك من نفسك.
ندى: شكرا , باي.
شادي: باي.
واغلقت السماعة وهي تفكر فيما قال, فقالت هايدي في سرعة.
هايدي: ايه قالك ايه؟, عرف اننا جمبك؟.
ندى: لا, شك الاول وبعدين عادي.
هالة: هه, قالك ايه عليا؟.
نظرت اليها في تردد, ثم قالت.
ندى: قال مفيش حاجة, هي بس الي مكبرة الموضوع, هي بس بتحب تبقى موجودة اربعة وعشرين ساعة مبتقدرش ان الواحد بيبقى وراه حاجات تانية, وبتبقى منتظرة ان الواحد يعاملها بالمثل.
التفتت هالة الى هايدي.
هالة: يعني زي ما قلتلك اتقلي عليه شوية, متبقيش مدلوقة زي ما بتعملي دايما, كده بتزهقيهم منك.
هايدي: اعمل ايه يا هالة؟, مش المفروض الي بيحب حد بيحب يسأل عليه ويبقى معاه على طول.
ندى: ايوة معاه, مش على قلبه.
هايدي: بس كده, هو دا الي قاله؟.

ندى: اه, يعني هو قال مفيش حاجة, انتي بس الي حاسة كده, مش عشان هو مبيسألش كتير يبقى مش مهتم.
هايدي: كل دا قاله في الدقيقتين دول بس.
ندي: لا, دا يعني الي فهمته من كلامه.
هالة: عشان تبقي تسمعي كلامي, مش كل ولد تعرفيه تطفشيه كده, اتقلي , اتقلي يابنتي مبتعرفيش تتقلي؟.
ندى: شوفي مين الي بتنصحك.
هالة: قصدك ايه يا ندى؟.
ندى: مانتي برضه بتموتي في حاجة اسمها عمرو مجدي, قالك يمين يمين, شمال شمال, مبتفكريش, ولا بتتقلي ولا نيلة زي ما بتقوليلها.
هالة: بس انا متأكدة ان عمرو بيحبني, هي لسه مش متأكدة من شادي. ندى: اهو كلام.
هايدي: يا ندى انتي بتتكلمي كده بس عشان لسه مجربتيش, بس لما يجيلك يوم وتحبي, هتعرفي ازاي لما يكون احلى ما على قلبك انك تسمعي كلام الي بتحبيه.
ندى: دا كلام فارغ, حتى لو بحب محدش هيقدر يمشيني.
هالة: اهو انا كنت بقول زيك كده برضه, فاكرة؟, واديكي شايفة.
ندى: عشان انتي عيلة رجعتي في كلامك,بس انا بقى عند كلامي, وبكرة تشوفي.
هالة: بكرة انتي الي تشوفي.

الحلقة الرابعة


شعرت ندى بالحرج وهي تقف مع شادي وحدها, في انتظار هالة, بعد ان صادفتاه بمكتب تقديم اوراق الرغبات, فطلبت هالة من ندى ان تنتظرها مع شادي الذي كان قد انهى تقديمه ,وستدخل هي وحدها نظرا للزحام.
وقف شادي يتأملها وهي تتأفف وتنظر بعيدا, فشعر بحرجها.
شادي: انتي مكسوفة تقفي معايا ولا ايه؟.
ندى: لا عادي ,مفيش حاجة.
شادي: شكلك هتضربيني.
ندى: دا العادي بتاعي, ولا نسيت؟.
شادي: هو انتي قلتي لهايدي ايه بالظبط؟. نظرت اليه ندى قبل ان تجيب في اقتضاب.
ندى: قلتلها تخف عليك شوية , وتبطل تلقيح.
ضحك شادي, وهو يقول.
شادي: قلتيلها تبطل تلقيح؟ , يخرب بيت لسانك يا ندى, دانتي طلعتي مشكلة
ردت بغيظ, وكأن كلامها موجة له.
ندى: قلتلها اتقلي عليه شوية, مش كده, محدش يستاهل. شادي: بس الظاهر انها مبتفهمش, لانها زي ماهي, بس جت قالتلي انا الناس بتقولي اتقل عليك, وانا عشان بحبك مش راضية اعمل زي مابيقولولي.
وضحك لما قال, بينما اغتاظت ندى.
ندى: شوف الغبية رايحة تقولك ايه؟.
شادي: بس انتي كدبتي عليا ياندى, هي كانت جمبك وانتي بتكلميني, صح ولا لأ؟.
ردت ببرود.
ندى: ملكش دعوة.
ابتسم في هدوء وهو يتأملها ثم قال.
شادي: انتي مبتطيقينيش ليه يا ندى؟.
ندى: ومين قالك اني مبطيقكش؟.
ابتسم ولم يجب, بل رد بسؤال.
شادي: نمرتك دي الي كلمتيني منها؟. ردت باقتضاب وهي تشيح بوجهها.
ندى: ايوة.
شادي: انتي داخلة علمي ولا ادبي؟.
التفتت اليه وقد ضاقت ذرعا بأسئلته.
ندى: انت بتسأل كتير ليه؟.
شادي: عادي يعني.
تأففت في ضيق.
ندى: اووففف.
شادي: انتي زهقتي؟.
قالت دون ان تنظر اليه.
ندى: برضه بتسأل.
شادي: طيب خلاص انا هسكت.
وصمتا قليلا.
شادي: انتي اخت صاحبتها مش صاحبتها اوي يعني.
ندى: نعم؟.

شادي: هايدي, انتي مش صاحبتها اوي عشان تخليكي تتكلمي عشان خاطرها, ايه الي خلاكي تكلميني؟.
ندى: محدش خلاني اتكلم.
شادي: يعني انتي كلمتيني من نفسك, قمتي كده جبتي نمرتي من موبايلها وكلمتيني , مفتكرش انك ممكن تعملي حاجة زي كده.
ندى: انت عايز ايه من الاخر؟.
شادي: مفيش.
ثم صمت قليلا, وقال.
شادي: اصل هايدي دي انا مبحبهاش.
نظرت اليه في اندهاش غاضب.
ندى: امال بتكلمها ليه؟, لما انت مبتبحبهاش.
شادي: ما هو مش انا الي بكلمها, هي الي بتكلمني, وبعدين...الي بينا دا مش حب.
نظرت اليه في دهشة.
ندى: امال انتو بتعملو ايه مع بعض؟.
شادي: عادي, بنتسلى.
ندى: ياسلام.
شادي: اه والله.
ندى: وانت بتقولي انا الكلام دا ليه؟.
اشاح وجهه عنها ينظر بعيدا.
شادي: معرفش, اصل انا شايف ان البنت المفروض تبقى تقيلة مش كده يعني.
ندى: تصدق الولاد دول فعلا ميستاهلوش , يعني عشان البنت تعجبكو لازم تديكو بالجزمة, لكن لو بقت زي لخاتم في صباعكو تبقى لزقة ورامية نفسها ومتحبوهاش.
قال بسخرية.
شادي: مش كده اوي يعني.
ندى: وبعدين انت اشفهمك في البنات اصلا؟, هو انت مش دحيح , وملكش في الجو دا, وعاملي فيها شاطر.
ضحك شادي ملء شفتيه , بينما تعصبت هي.
ندى: انت بتضحك على ايه؟, بطل ضحك, فهمني بتضحك ليه؟.
شادي: اصل.., مين قالك اني معرفش بنات؟, هايدي؟.
ندى: انت بتضحك عليا؟.
شادي: ولو مبصاحبش, دا مش معناه اني معرفش في البنات, والله البت هايدي دي غريبة ,يعني لفت كل دا, وبرضه عبيطة

ندى: تصدق هي صعبت عليا دلوقتي , انها تعرفك, عشان انت فعلا بارد ورخم كمان.
شادي: انتي مش ممكن, لسانك دا مبيبطلش غلط في الناس عادي كده.
تعجبت ندى من نفسها ايضا لانها على غير عادتها قليلة الذوق معه, وكما قال دائما ما تعنفه, وشعرت بوجوده قربها يحرك اسوأ ما فيها.
ندى: الناس الرخمة بس.
وصمتا ثانية.
شادي: تتضايقي لو كلمتك في التليفون؟.
ندى: ليه؟.
شادي: عادي يعني اسأل عليكي.
ندى: ليه؟.
شادي: مترديش سؤال بسؤال, تتضايقي ولا لأ؟.
ندى: هايدي هي الي هتتضايق.
شادي: ماشي, فهمتك.
وصمتا.
شادي: انتي مصاحبة ياندى؟.
قالت بنفاذ صبر.
ندى: وانت مالك؟.
شادي: يمكن عشان كده مش عايزاني اكلمك؟.
ندى: انت عايز مني ايه ؟. شادي: عادي يا ندى, نبقى اصحاب, ولا انتي مبتصاحبيش صبيان؟.
نظرت اليه ندى في شك, ووصلت اختها قبل ان تجيبه, فعاد هو لتجاهلها كعادته, بينما شعرت هي بالدهشة من تصرفات شادي الغير واضحة.
شادي: هه؟, خلصتي؟.
هالة: ايوة, متأخرتش صح؟.
شادي: ان شاء الله نقبل في هندسة سوا.
هالة: يارب يا شادي, بجد نفسي.
شادي: انتو رايحين فين بعد كده؟, مروحين؟.
هالة: لا, رايحين مشوار وبعدها نروح.
شادي: طيب , انا همشي بقى , يلا سلام.
هالة : سلام يا شادي.
بينما تسمرت ندى تنظر اليه في ضيق, فاشار لها بيده بعد ان التفتت هالة عنه,وضع يده على اذنه, وهو يحرك شفتيه "هكلمك".

الحلقه الخامسه بقى نااار تابع

مرسي لمجهودك يا مصطفي



بجد المنتدى كسب عضو محترم ذيك

مصطفى بجد قصة جامدة جدا ......... انا مش عارفة اقول ايه............. بس القصة حلوة جدا
هتنزل الحلقة الخامسة امتى ..........انا مستنياها على نار..........ميييييييييييييييييييييييييييرسيه
كتير ليك.................
_____________________________________
لا تحزن على شىء............... ذهب لانه لن يعود ثانيا

جميله جدا



يلا بقى عايزين الحقله الخامسه


بسرعه

ميرسى ليكى يا هاله انتى وديوار وباربى على ردكم الجميل ده وانشاء الله هكملهلكم

اتصل شادي بندى ليلا, وعجزت هي عن اخبار اختها بذلك, حتى لا تخبر هايدي, ولكنها لم تعرف بعد حقيقة مشاعرها تجاه المكالمة, فشادي غير صريح بتاتا.
شادي: انتي كنتي خارجة النهاردة,صح ؟.
ندى: اه ليه؟.
شادي: اصلي شفتك في سنوبي النهاردة, كنتي قاعدة مع اصحابك.
ندى: انت بتروح سنوبي؟.
شادي: مش كتير, انا واصحابي دايما قعدتنا في سي بريز بس النهاردة قلنا نغير.
ندى: ممممممم, بس كنت قاعد فوق بقى عشان كده مشفتكش.
شادي: اه منا شفتك وانا طالع, بس واحنا نازلين كنتي مشيتي. ندى: اه ممكن.
وصمت لحظة ثم قال؟
شادي: كنتي امورة اوي على فكرة.
ندى: امورة؟.
شادي: اه, ايه؟, اول مرة حد يقولك انك امورة؟.
ندى: لا , بس انت غريبة يعني منك.
شادي: يا نودي انتي على طول امورة, بس يعني انا شايف ان ليكي اصحاب محجبات كتير, مفكرتيش تتحجبي انتي كمان؟.
ندى: فكرت بس لسه بدري, انا صغيرة.
شادي: مع انك هتبقي زي القمر في الطرحة.
ندى: وبعدين بقى.
شادي: فيه ايه؟.

ندى: بتتكلم في حاجات ملكش فيها.
شادي: امال الي ليا فيه ايه؟.
ندى: معرفش.
شادي: طب بصراحة كدة انتي رديتي عليا ليه؟.
ندى:........
شادي: عشان انا جارك؟.
ندى: طيب انت كلمتني ليه؟.
شادي: عشان انا عايز اقرب منك.
ندى: ليه؟.
شادي: انتي بقيتي بتسألي كتير .
ندى:اتعلمت منك.

شادي: على فكرة انا بحترم باباكي اوي, من وانا صغير وانا نفسي ابقى زيه.
ندى: بابا دا زي العسل كل الناس بتحبه.
شادي: وطنط كمان.
ندى: ممممم.
شادي: انتي عايزة تقفلي ولا ايه؟, زهقتي؟, انتي بتزهقي مني بسرعة على فكرة.
ندى: ازي هايدي؟.
شادي: معرفش, مكلمتهاش بقالي كتير.
ندى: اتخانقتو؟.
شادي: لا, قلتلها احنا محتاجين وقت نبعد عن بعض, عشان نحدد مشاعرنا.
ندى: انت قالبها عشان هي مش هتدخل معاك هندسة؟.
شادي: وهو دا مثلا سبب ان ولد يسيب بنت؟.
ندى: امال مالك بتعاملها كده ليه؟.

شادي: انا كنت فاكرك اذكى من كدة.
ندى: انت مش قلتلي اني ذكية بس حركات العيال بتغطي عليا.
شادي: لا , دانتي قلبك اسود كمان.
ندى: الكلام دا انت قلته ولا لأ؟.
شادي: قلته بس من ورا قلبي.
ندى: شادي,......... اقفل.
شادي: مالك؟.
ندى: معرفش, مش مستريحالك, فاقفل لو سمحت.
شادي: انتي خايفة مني؟.

ندى: انت صاحب صاحبتي, ومينفعش الي انت بتعمله دا.
شادي: ايه ياندى هو انا قلت حاجة؟.
ندى: مقلتش, بس انا مبحبش كده, لف ودوران وهبل, انا مبصاحبش وخصوصا لو كنت انت مصاحب.
شادي: انتي هبلة يا بنتي, وهو انا قلتلك صاحبيني, احنا بنتكلم عادي.
ندى: امال انا مش مطمنالك ليه؟.
شادي: يا نودي اعتبريني اخوكي بما انك معندكيش اخوات ولاد, كويس ان البنت يكون ليها صديق ولد تعتمد عليه وتسأله , ويفيدها, وانا معنديش مانع اكون دا بالنسبة ليكي, انتي عزيزة عليا جدا, ومفيش حاجة في الي بنعمله غلط.
ندى: يعني انت شايف كده.
شادي: طبعا. ندى: طيب.
ومع نهاية المحادثة بدأ شعورها بعدم الراحة من ناحيته يتغير, بل بدأت تشعر بالارتياح للتحدث معه في امور عادية , ولكنها بعد ان انتهت لم تفكر الا به, وهي تقنع نفسها بانه ليس اكثر من صديق.

دخلت ندى غرفة نسمة اختها دون ان تطرق الباب ,وجلست على السرير في صمت, فاعتدلت نسمة و تركت ماوس الكمبيوتر وهي تلتفت اليها, ونظرت اليها مليا ثم قالت.
نسمة: عملتي ايه؟.
ندى: ...........
نسمة: عملتي ايه يا مصيبة انطقي؟, شكلك كده عاملة حاجة.
ندى: معرفش يا نيسو, انا محتارة اوي.
نسمة: ومادام جيتي تقوليلي انا مجرتيش على هالة حبيبتك تحكيلها ,يبقى الي انتي عاملاه فيها هي.

ندى: مش هي اوي.
نسمة: امال في مين؟.
ندى: نسمة, فاكرة شادي؟.
نسمة: شادي مين؟.
ندى: شادي عبد الحي, الي ساكن في البرج الاحمر, كنا بنلعب سوا في النادي واحنا صغيرين, مش فاكراه؟.
نسمة: اه, القصير ابو شعر طويل, الي مامته كانت دايما سايباهوله زي البنات, دانتي كنتي بتضربيه ضرب.
ندى: ايوااااه, هو ده. نسمة: ماله؟.
ندى: معرفش, انتي عارفة انه كان بيجي لبابا هنا ياخد درس قدرات عمارة مع هالة؟.
نسمة: لا والله العظيم؟, هو دا الواد الطويل الاسمر الي كان بياخد معاهم؟, تصدقي انا شفته كذا مرة بس مخدتش بالي انه هو.
ندى: هو يا ستي, وهايدي بقت مصاحباه, وبعد كده , خلوني اكلمه عشان كانو متخانقين وهي بتقول عليه بارد, وبعدها قعد يكلمني على موبايلي انا.
نسمة: ليه؟.
ندى: معرفش, بيقولي نبقى اصحاب وانتي محتاجة اخ تعتمدي عليه, وانا الاخ دا, وانا بعزكو انتي واخواتك, وبس,بقى بيكلمني على طول, وانا كمان بقيت بكلمه.
نسمة: كل دا وهالة متعرفش؟.
ندى: منا مش عارفة اقولها ازاي؟, لحسن تقول لهايدي وهايدي تعملها حكاية وتفتكر فيه حاجة وهو مفيش.

نسمة: ممممم, طب وبعدين.
ندى: ماهو بعدين دا الي انا خايفة منه, نسمة, انا حاسة اني معجبة بيه.
نسمة: يخرب عقلك, طب وهايدي؟.
ندى: احنا صحاب وبس, مفيش حاجة, بس انا خايفة اتعلق بيه , هو انا كده بخون هايدي؟.
نسمة: مش عارفة.
ندى: طب اقول لهالة؟.
نسمة: المفروض, عشان لو عرفت بعد كدة هتزعل منك.
ندى: انا مش مطمنة لا ليه ولا لنفسي, انا خايفة احبه يا نسمة , وانا عمري ما حبيت حد. نسمة: حب ايه وزفت ايه دلوقتي انتي كمان, انتي يا ماما خمستاشر سنة , مستعجلة على ايه, ولا انتي بتقلدي وخلاص, عشان هالة مصاحبة عمرو مجدي من وهي في تانية ثانوي ,يبقى انتي كمان لازم تحبي وانتي في اولى ثانوي.
ندى: ايه الكلام دا, لأ طبعا.
نسمة: انا نفسي تبطلي تمشي وراها, ويبقى عندك شخصيتك انتي بقى , مش كل حاجة هالة بتعملها صح.
ندى: انا مش ماشية ورا هالة, انا مبطيقش عمرو اصلا.
نسمة: نيدو يا حبيبتي , انتي داخلة على ثانوية عامة, ركزي في مستقبلك وسيبك من العك دا, ربنا يهديكي.
وقفت ندى تقول.
ندى: انا غلطانة اني جيت احكيلك اصلا, انتي على طول مقفلاها في وشي كدة, لما نشوف هتعملي ايه في النتيجة بتاعتك يا فالحة. نسمة: خليكي في نفسك وفي العك بتاعك, بدل ماتتريأي على هالة كل شوية خدي بالك لتقعي وقعتها.
ندى: بس شادي مش زي عمرو, وبعدين انا مش هالة واحنا مفيش بينا حاجة اصلا, احنا اصحاب وبس.
قالت نسمة بسخرية.
نسمة: اصلك ناقصة اصحاب.
فخرجت ندى من الغرفة غاضبة وشاعرة بالذنب في نفس الوقت.

تابع الحلقه السادسه فيما بعد

لالالالا

بطل تشويق بقى



وبسرعه كمل الحلقات

هههههههههههههههههه لا انا عاوز المنتدى كل يتابع معانا المسلسل ده الاول عشان هو فعلا جميييل

الحلقة السادسة


جلست ندى في الكافية مع هايدي وهالة وصديقاتهما , وهي تسترق السمع لحديثهما, محاولة ابداء اللا مبالاة على وجهها, مع انها تفور من الداخل.
هالة: يعني المهم اتصالحتو ولا لأ؟.
هايدي: اتصالحنا, بس هتجن منه يا هالة,لسه زي ماهو, بارد برضه.
هالة: خلاص , يبقى هو كده فعلا.
هايدي: لا, انا شاكة في حاجة تانية.
هالة: ايه؟. هايدي: فيه واحدة تانية.
امتقع وجه ندى في شدة وهي تسمع.
هالة: واحدة تانية ازاي يعني؟.
هايدي: معرفش, بكلمه باليل كتير الاقيه مشغول, واما اقوله بعد كده يقولي انا ببقى نايم, يمكن اخويا بيتكلم من موبايلي.
هالة: بجد؟.
هايدي: اه والله, بس انا حاسة انه بيكلم واحدة تانية.
هالة: يا بنتي دا هو كلمك انتي بالعافية, بيعرف يكلم واحدة تانية ازاي؟.
هايدي: معرفش يا هالة, انا هتجنن منه, انا حساه مش واضح وحكاية انه ميعرفش بنات دي ,حكاية كده هو راسمها عن نفسه. هالة: مممم, واخبار محمد ايه؟.
هايدي: اهو محمد دا الي حكايته حكاية, امبارح يا ستي كلمني تاني, يقولي اسف, وانا عارف اني غلطت في حقك, وانا لسه بحبك, وعرفت قيمتك , واديني فرصة, وفكري, ووحياة الي ما بينا, وكدة بقى.
قالت ندى في راسها" يخرب بيـــــتك هو فيه محمد كمان؟؟؟".
قالت هالة في استهجان.
هالة: هو رجع تاني؟.

هايدي: اهو موال كل صيف, السيزون بتاع البرنس حمادة , كل ما يسيب امنية زفت بتاعته دي ,يرجع يقولي انا بحبك وانا اسف, بس انا تعبت فرص يا هالة.
هالة: انتي بتفكري فيه لسه؟.
هايدي: معرفش, والبارد التاني الي معايا دلوقتي مش مديني فرصة انسي بيه حد, هيجنني هو كمان.
هالة: طيب ولو محمد بجد عايز يرجع المرة دي وندمان, هتعملي ايه؟.
هايدي: مش عارفة. قالت هالة ممازحة.
هالة: دا حمادة يا هايدي, الحب الحب والبلوبيف بلوبيف.
هايدي: الله يخليكي يالولو متفكرنيش لحسن قلبي بيوجعني, ماهو انا لو مكنتش زي الهبلة كده كل مايكلمني ارجعله, كان زماني مستريحة.
هالة: والله شوفي دماغك, بس يرجع بشروطك بقى مش زي كل مرة.
هايدي: ليه هو انا هبلة؟, طبعا المرة دي يعرف حدوده بقى.
اخذت ندى تفكر فيما قالتا, ولم تعد تشعر بالندم كما في باديء الامر , بل شعرت بالاندهاش, ان الامر عادي, كما قال لها شادي, انهما لايحبان بعضهما البعض, لم هما معا اذن؟؟.

ــــــــــــــ
شادي: بس انا فرحان اوي اني دخلت هندسة مع هالة.
ندى: عشان هندسة ولا عشان هالة؟.
شادي: لا, هندسة كده كده انا كنت داخلها, بس عشان اختك معايا.
ندى: ايه الغرور دا؟, في حاجة اسمها انا كده كده داخلها.
شادي: دا يعني بعد توفيق ربنا.
ندى: بعد ايه ,مانتا خلاص قلتها.
ثم قالت.
ندى: انت لسه بتكلم هايدي؟.
شادي: يعني. ندى: مممم.
شادي: بصراحة انا عايز اسيبها بس مش عارف.
ندى: ليه؟.
شادي: ......اصل انا معجب بواحدة تانية.
قالت ندى بذعر.
ندى: الله يخرب بيتك, انت يا بني مش مركز ليه؟, يا تسيبها يا تبقى معاها, مينفعش تبقى معاها ومع واحدة تانية.
شادي: انتي خايفة عليها كده ليه؟.
ندى: عشان انت مش بني ادم صريح يا شادي, اي واحدة معاك تبقى خايفة على نفسها.
صمت لحظة ثم قال بصوت خافت. شادي: طب ولو قلتلك ان الي انا معجب بيها دي انتي, ابقى مش صريح برضة؟.
صمتت ندى ,وقد تفاجئت بما قال.
شادي: انتي اتخضيتي ليه؟.
ندى: انت بتقول ايه؟.
شادي: بقول اني معجب بيكي يا ندى.
ندى: منا سمعت.
شادي: فمعرفش بقى موضوع هايدي دا انا عايز اخلصه, عشان انا اصلا حاسس انها هي كمان عايزة تخلصه.
ندى:........... شادي: ندى انتي محسساني انك متفاجئة ليه؟, انا مكانش باين عليا للدرجة دي؟.
ندى: معجب بيا انا؟.
شادي: وانتي كمان معجبة بيا ,متنكريش.
شعرت بالذعر, كيف عرف؟.
ندى: شادي؟, ايه الكلام دا؟.
شادي: انا بحس كتير في كلامك انك مهتمة, ودي حاجة بسطتني اوي يا ندى,وجرأتني اني اقولك الكلام دا,انا بجد كان نفسي اقابل شخصية زي شخصيتك دي من زمان.

شعرت ندى بالسعادة والدهشة والحرج في ان واحد ولم تدر بم تجبه, فقالت في تلعثم.
ندى: بس....بس انا ....مبصاحبش.
شادي: واهي دي اكتر حاجة عجبتني فيكي, انك مؤدبة, وكمان فيكي حاجة حلوة اوي ,انك مبتفكريش في الكلام قبل ما بتقوليه, الي في قلبك على لسانك على طول, انتي مفيش منك اتنين دلوقتي, انتي عجباني اوي.
ندى: بس يا شادي.
اكمل شادي متجاهلا طلبها.
شادي: حلوة وظريفة وبنت ناس, وشخصية دماغك شغالة , هو مش دايما صحيح بس شغالة يعني, وانا بحب اتكلم معاكي. نهرته بعد ان شعرت بقلبها يدق بعنف.
ندى: قلتلك بس يا شادي, انت صاحب صاحبتي, عيب الي بتقوله دا, انت قلتلي ان احنا هنبقى اصحاب مش اكتر, بس اكتر من كده, مينفعش, ...يخرب عقلك, دي هالة لو عرفت هتموتني.
شادي: ليه؟, هي مش هالة مصاحبة عمرو مجدي باين؟, اشمعنى انتي؟.
ندى: مش عشان كده, عشان هايدي يا ذكي.
شادي: انتي يعني مش عايزاني عشان خاطر هايدي, طب والله العظيم يا ستي هايدي ما بتحبني, ومتخافيش عليها اوي كده. صاحت به.
ندى: شادي, انت مجنون, انا مش عايزة اصاحب اصلا, متلعبش في دماغي, انا لسه صغيرة, ولو اضطريت في مرة يبقى عشان انا بحب البني ادم دا بجد, مش عشان اصاحب كده وخلاص.
وشعرت بكلام نسمة يدور في عقلها.
شادي: وانتي هتحبيه ازاي من غير ما تقربي منه؟, انا كنت فاكرك زكية.
ندى: يووووه يا شادي بقى, اقفل الموضوع دا, خلاص.
شادي: انتي يا بنتي انتي طاقة ولا ايه؟, موضوع ايه الي اقفله, مش لما تديني سبب اصلا انك مش عايزاني. ندى: .........
شادي: انتي شكلك هبلة مش زي ما كنت فاكر, يا ندى من الاخر كده انا شكلي هحبك, متخلنيش ارجع في كلامي.
ندى: انت بتهددني؟؟.
قال باستياء.
شادي: انا كنت عارف انك عيلة وهتخافي.
دهشت من تراجعه , وغضبه. ندى: شادي.
شادي: خلاص يا ندى اقفلي, تصبحي على خير, خدي بالك من نفسك.
هتفت به.
ندى: شادي , استني.
شادي: استني ايه بقى مانتي بتهزئيني كأني متصل اشتمك, انا مكنتش عايز اقلك اصلا, انا غلطان اني قلتلك.
ندى: ليه غلطان؟. قال بصدق.
شادي: عشان كنت عارف انك هتتريأي عليا ,وهتعيشي الدور وترفضيني.
ندى: تقوم انت كرامتك تخليك تقفل, دا ايه دا؟, هو مش المفروض الي بيعوز حاجة بيدافع عنها؟.
شادي: مانتي ياندى مش طايقالي كلمة.
هدأت ندى قليلا.
ندى: خلاص يا سيدي ,والله مازعلانة منك. شادي: اهو عشان كده انا مبحبش اكلم بنات, كل واحدة من دول بتبقى عايزة تعمل ميدالية تعلق فيها اسم كل واحد حبها, وتتغر وتتنطط , وانا بقى كله الا كرامتي.
ندى: دانت بجد شايف نفسك.
شادي: انتي بتهذري؟.
ندى: لا خلاص خلاص, سوري.
ذفر ليستعيد هدوئه.
شادي: طيب ياندى, شوفي دماغك , وانا مش بتحايل على حد, انا عارف ان البنات بتحب الزن والحاجات الهايفة دي, بس انا بجد عايزك, بس لو انتي مش عايزة, انا مش هغصب عليكي.
ندى: طيب.
شادي: باي باي, خدي بالك من نفسك.

ندى: حاضر.
شادي: سلام.
ندى: سلام.
واغلقت الخط وهي تفكر فيما قال , وعادت من الصالون ووقفت امام باب غرفة نسمة, وترددت قليلا, ثم قررت دخول حجرتها هي وهالة.
ندى: هالة ,انتي نمتي؟.
هالة: لا.

والتفتت وهي تضع هاتفها من يدها, تنظر الى ندى الحمراء الوجة في دهشة.
هالة: ايه دا يابنتي؟, انتي شبة الطماطماية ليه؟.
ندى: هالة, بصراحة كده, انا عايزة احكيلك حاجة, بس متزعقليش.
هالة: اتفضلي يا ستي.
ندى: عشان خاطري متزعليش مني.
هالة: ماتحكي اخلصي.
جلست ندى على السرير في تردد, وجمعت الافكار في رأسها ثم
حكت لاختها الكبرى كل شي

الحلقة السابعة


هالة: حركة وحشة اوي منكو انتو الاتنين, يعني هايدي دلوقتي لما تعرف هيبقى منظرك ايه؟.
ندى: معرفش.
هالة: وانتي مقلتليش ليه من الاول؟.
ندى: خفت تزعلي.
هالة: ازعل منك عشان صاحبتي؟, يابنتي انتي اختي, وهي كمان مش حب عمرها شادي دا مثلا,...المهم قوليلي, هو قالك بحبك؟.
ندى: لا.
هالة: امال؟.
ندى: قالي انا كان شكلي هحبك.
هالة: يعني بحبك بس باستهبال شوية.
ندى: معرفش يا لولو, انا اعمل ايه بقى؟.
هالة: سيبك من هايدي, انتي بتحبيه؟. ندى: معرفش.
هالة: ازاي متعرفيش, انتي معجبة بيه؟.
ندى: ايوة,اوي, وقلبي قعد يدق لما قالي انا معجب بيكي, بس هو غريب يا هالة, كان بيقول الكلام بالعافية, ولما لقاني هقفل عليه في الكلام اتقمص.
هالة: بس المهم انه نطق, اصل الصبيان الي كرامتهم بتوجعهم دول بيبقو كده, يبقى الولد شايف نفسه, وشايف انه يحب البنت من بعيد احسن عنده من انه يروح يصارحها وهي تتنك عليه.
ندى: انا خايفة يا لولو, يعمل فيا زي ما عمل في هايدي,ولو حبيته يسيبني ويحب واحدة تانية.
هالة: يا حبيبتي هو وهايدي اصلا مكانوش بيحبو بعض, وبيني وبينك كده, هايدي اصلا بتحب واحد تاني اسمه حمادة السلموني, وتقريبا كده رجعو لبعض دلوقتي. ندى: يعني ايه؟.
هالة: يعني لو عايزاه يا نيدو دوسي, سيبك من هايدي, ولا يهمك, سبيها عليا.
دخلت نسمة في هذه اللحظة ,فالتفتتا اليها وصمتتا, فتوقفت تنظر اليهما في شك.
نسمة: مالكو, اتخضيتو كده ليه؟,انا داخلة اجيب الفلاشة.
قالت هالة بمزاح.
هالة: خليكي قاعدة قدام الكمبيوتر طول اليوم زي المتخلفين.
ندى: هما المتخلفين الايام دي الي بيعدو قدام الكمبيوتر, امال الي زيك بيقولو عليهم ايه.

ـــــــــــــــ
ندى: هاخد بيولوجي عند مستر مدحت الي بيدينا في المدرسة.
شادي: انتي برضه لسه مصممة, يا بنتي خدي الكيميا الاول, عشان لو منفعش علمي علوم تكملي رياضة.
ندى: قلتلك مبحبش الرياضة, انا عندي احول ادبي ولا اخد رياضة اتنين دي, دي كانت هالة بتصوت منها.
شادي: امال هتدخلي هندسة ازاي؟.
ندى: ومين قال اني عايزة هندسة.
شادي: .........وليه مش عايزة هندسة؟. ندى: مبحبهاش, وبعدين كفاية اتنين مهندسين في العيلة, دا بابا لو عليه يطلعنا كلنا مهندسين زيه.
شادي: والله الراجل عنده حق,.......هو انتي نازلة الساعة كام؟.
التفتت ندى تنظر الى الساعة المعلقة خلفها, فلمحت هالة مقبلة وقد انهت ارتداء ملابسها.
ندى: حالا اهه, هالة خلصت.
شادي: طيب خدي بالك من نفسك, ورنيلي لما تروح.
ندى: اوكاي, عايز حاجة؟.
شادي: لا شكرا, سلميلي على هالة.
ندى: حاضر, باي.
شادي: باي.
واغلقت الخط وهي تلتقط حقيبتها فقالت هالة.
هالة: شادي؟.
ندى: ايوة.

وخرجتا من المنزل واستقلتا المصعد.
هالة: مفيش جديد؟.
ندى: لا.
هالة: مكلمكيش في حاجة تاني؟.
ندى: لا, بس احنا بنتعامل عادي.
هالة: عادي ازاي بقى , دا بيكلمك قبل ما ينزل, واول ما بيرجع, وبترنيله وانتي نازلة, وبتعرفيه لما ترجعي, وعلى طول مكالمات, لا واللون دا بيبقى وحش عليكي يا ندى متلبسيهوش تاني, لا البادي دا مفتوح, منين مفيش حاجة بقى؟.
ندى: ماهو مش انا الي هروح اسأله, اقله انت نسيت الموضوع الي فتحته معايا ولا ايه؟, هو ومنطقش من يوميها حاجة, اعمله ايه يعني.
هالة: بس خلاص انتو كده بتتعاملو معاملة مرتبطين.

ندى: وايه المشكلة؟.
هالة: يعني انتو كده مرتبطين ولا لأ؟, انا مش فاهمة.
ندى: ولا انا والله, بس انا مبسوطة كدة.
هالة: طيب, انتي حرة, مادام مبسوطة

اغلق شادي الخط مع ندى وشرد قليلا, فقال صديقه وهو يقود السيارة.
سامح: ايه ياعم, كل دا كلام, هايدي برضه, انا مش قلتلك اخلع , مش هتسلك معاك البت دي.
التفت شادي اليه يقول.
شادي: لا مش هايدي, هايدي ايه وبتاع ايه, جيبلي سيرة عدلة وحياة ابوك.
سامح: امال مين الجو؟.

شادي: دي جارتي ,بنت المهندس الي كنت باخد عنده القدرات.
سامح: مين؟, صاحبة هايدي؟, مش دي الي مظبطة مع عمرو مجدي الي في فنية عسكرية, هو حلقلها ولا ايه؟.
شادي: مش دي, اختها بقى, الصغيرة, الي في اولى ثانوي. سامح: وانت جاي تعيل على اخر سنة, مش قلنا خلاص بقى, شغل ثانوي دا ننساه, احنا داخلين على الكليات , يعني, هنشوف اشكال جديدة بقى.
شادي: وايه المشكلة؟, البنت حلوة, وعجباني, وبيني وبينك, انا شكلي بحبها.
سامح: هي وصلت لبحبها, طيب يا سيدي ربنا يكرمك,وانت بقى خلاص مظبط معاها.
شادي: والله مش عارف, انا لغاية دلوقتي معرفش هي حاسة نحيتي بايه, بس احنا شبه متصاحبين يعني.
سامح: طيب يا سيدي, دوس.
شادي: منا دايس انت عارفني. سامح: ماهو انا لو مش عارفك مكنتش قلقت عليك, انت من امتى بتكلم بنات, ما طول عمرك هما الي بيجو لحد عندك يكلموك, وكنا احنا نعد نتحرق دمنا, وانت تتنك عليهم, وهما زي الصواريخ, وتيجي يعني عند عيلة وتقول معجب بيها, انا مستغربك.
شادي: انا نفسي مستغرب نفسي.
سامح: هي حلوة اوي للدرجة دي؟.
شادي: لا , حلوة بس عادية.
سامح: يبقى اكيد شخصيتها جامدة.
شادي: بالعكس, دي عبيطة جدا, ولسانها فالت.
سامح: الله, امال ايه الي وقعك فيها.
شادي: تصدق لو قلتلك معرفش, انا لقيتني مرة واحدة بتشد ليها.
سامح: ااااه, ربنا يستر عليك يا معلم, انت لازم بقى تتأكد هي بتحبك ولا لأ, لانك ضعت خلاص. شادي: تفتكر هي مبتحبنيش؟.
سامح: انت هتسألني انا ليه؟, اسأل نفسك.
شادي: بس هي كل تصرفاتها بتدل على انها بتحبني.
سامح: برضه لازم تتأكد, مش يمكن انت شايف غلط.
شادي: تفتكر.
سامح: معرفش.
عاد شادي يشرد في قلق وهو يفكر, هل تحبه ندى حقا, ام انها اعتادت عليه ليس الا.

انتظروا الحلقه الثامنه !!!!!!!!!

لازم تنزلها عشان انا داخلة على امتحانات ولا اقولك نزلها بعد الامتحانات علشان الحق اقاراها معاكو............... ولا اقولك برحتك نزلها وقت ما تحب..........بس بجد عايزة اقولك ان القصة دى بجد جامدة جداجدا جدا ..........ربنا يوفقك .....
_______________________________________
لا تحزن على شىء........... ذهب لانه لن يعود ثانيا

اه ربنا معاكى انا كنت فاكرك فى سنه تانيه بس عشان خاطرك هحاول انزلها كلها

الحلقة الثامنة


ندى: اصلا نسمة دي غريبة, من كام يوم دخلت عليها الاوضة لقيتها بتجرب ايشربات وبتقول ناوية تتحجب, قعدت اتريأ عليها.
شادي: وايه المشكلة؟, البنت عايزة تتحجب تتريأي عليها ليه؟.
ندى: انت عارف هي عندها كام سنة, اربعتاشر يابني اربعتاشر.
شادي: هو بالسن؟, وبعدين لما تلاقي حد بيعمل حاجة كويسة متحبطيهوش.
ندى: هي حرة, هتبقى ماشية معانا شكلها مامتنا.
شادي: طيب ما المفروض انتي كمان تتحجبي انتي وهالة ونسمة.
ندى: انا؟, انا اتحجب دلوقتي اصلا؟, ليه, انا لسه صغيرة.
قال شادي في شيء من الحدة.


شادي: ايه صغيرة دي الي على لسانك على طول؟, لا , انتي مش لسه صغيرة والمفروض تتحجبي, وتعدلي لبسك الفظيع دا بقى.
قالت بعصبية.
ندى: انت بتتعصب عليا ليه؟,وانت مالك اصلا, وبعدين انا حرة اتحجب متحجبش, انت ايه يدخلك في حاجة زي كده؟.
شادي: ماهو الحق مش عليكي, الحق على اهلك الي سايبينك ماشية لبسك زي الزفت ,الي رايح والي جاي بيبص عليكي.
صاحت به ندى.
ندى: انت ازاي تكلمني كدة؟, انت اتجننت؟.


زفر شادي وتمالك اعصابه قليلا ثم قال.
شادي: عشان انتي تهميني يا ندى.
اكملت بنفس الغضب.
ندى: برضة متأمرنيش, انت ملكش اي حق تتدخل في هدومي.
شادي: انا محبش ان حد يبص عليكي بصة زيادة عن اللزوم, محبش حد يبص عليكي اصلا من اساسه .
ندى: ياسلام, وليه كده يعني؟.
قال بتسرع.
شادي: عشان انا بحبك.
تلجمت ندى تماما مما قال, لانه فاجأها بالكلمة وسط نقاش عادي.
ندى:...........

فأكمل هو بنفس الطريقة المتسرعة.
شادي: وبغير عليكي من اي حيوان ممكن يبص عليكي .
ندى:............
شادي: ياندى متستعبطيش انتي سمعتيني, انا بحبك ايوة, والي بقلهولك دا عشان مصلحتك, انا عايزك تظبطي لبسك دا شوية, انتي مش صغيرة زي ما بتقولي.
قالت بذهول. ندى: انت بتحبني؟؟.
شادي: ايه الغريب في دا يعني؟, امال انا بكلمك ليه؟.
ندى: بتحبني ازاي؟.
شادي: هو ايه الي ازاي؟, بحبك زي ما الناس بيحبو بعض يا ندى, بحبك انتي, انتي ياعبيطة انتي.
ندى: بس انت عمرك ما قلتلي قبل كده انك بتحبني.
شادي: انا كنت فاكرك زكية, انا كل تصرفااتي كانت بتدل على كده, يا ندى يا حبيبتي انا عمري ما رحت اكلم بنت في حياتي, مش انا الي كنت بروح اعملها ابدا, انا جيت اكلمك انتي, انتي مستغربة ليه؟, دانا الي المفروض استغرب.
ندى: يعني ..........هو احنا كدة مرتبطين؟

شادي: .....معرفش.
ندى: مانا كمان معرفش.
شادي: بس انتي بتحبيني صح؟.
ترددت ندى قبل ان تقول.
ندى: معرفش.
شادي: ماهو انتي ياهبلة يا اما عليكي عفريت اسمه معرفش, يعني هو مين الي يعرف اذا كنتي بتحبيني ولا لأ؟.
ندى: منا مش عارفة.
شادي: اه ياندى اه, شكلك هتطلعي عيني معاكي, انتي عبيطة يا بنتي؟, الي بيحب حد مبيعرفش هو بيحبه ولا لأ ازاي؟.
ندى: ماهو انا عمري ما حبيت قبل كده.
شادي: ولا انا.
ندى: يا سلام, كداب طبعا.
شادي: طب اقسم بالله ما حبيت قبل كده, انا مكنتش فاضي بجد, انا اهم حاجة عندي في الدنيا دي, امي, ودراستي, مفيش حاجة بعد كده.
ندى: اشمعنى؟.
شادي: معرفش, من زمان وهي نفسها ابقى مهندس, قلت طب والله العظيم لاكون مهندس, وبعدين هاني اخويا في الضياع, يعني هو اد نسمة دلوقتي, بس ولا عمره بص في كتاب اكتر من خمس دقايق. ندى: وباباك؟.
شادي: لا, بابا ميفرقش معاه انجح ولا اسقط , مش في دماغه التعليم, دايما يقولى, كانو خدو ايه المهندسين يعني, اهم ملقحين مش لاقيين شغل.
ندى: طب ليه الاحباط دا؟.
شادي: دا العادي بتاع بابا, بس يا ستي, دلوقتي بقى عندي حاجة كمان اهم.
ندى: ايه دي؟.
شادي: حضرتك.
ندى: اه , انا يعني.
شادي: هو انا مش مهم عندك ولا ايه؟.
ندى: لا مهم طبعا.
شادي: زي اخواتك ولا .......؟.
ندى: لا, اقل شوية. شادي: ايه دا الظلم دا؟.
ندى: مش انت قلت انا تالت حاجة مهمة بالنسبة لك, معلش ممكن تكون انت رابع حاجة مهمة عندي, بعد هالة وماما وبابا ونسمة.
شادي: ماشي يا نودي انا راضي.
ندى: بس انت بجد بتحبني ولا بتضحك عليا, زي الصبيان ما بيضحكو على البنات؟.
ضحك لسذاجتها.
شادي: وهو انا لو بضحك عليكي زي الصبيان كنت هقولك انا بضحك عليكي, انا ساعات بحس انك شاربة حاجة, بحس ان انا بكلم طفلة.
ندى: طيب ماهو انت ممكن تسيبني زي ما سبت هايدي.
شادي: وهوانتي زي هايدي؟, هايدي دي مصيبة لوحدها.
صمتت ندى ثم قالت بسذاجة.
ندى: بس انا خايفة لكون بحبك.

شادي: ليه كده يا ندى؟.
ندى: عشان ,...انا مكنتش عايزة احب .
شادي: ليه هو انتي مش بنت؟, ما كل البنات الي في الدنيا بيحبو, اسألي اي واحدة صاحبتك, وهتلاقيها مرتبطة وبتحب, اشمعنى انتي يعني.
ندى: ماهو انا مش عايزة ابقى زي حد.
شادي: لا ياحبيبتي مش هتبقي زي حد, احنا قصة حبنا هتبقى غير كل الناس.
ندى: اوعى تكون بتشتغلني يا شادي.
شادي: احنا الي بينا لازم يكون مختلف عن اي حد في الدنيا, لازم

الحلقة التاسعة


نادت والدة ندى عليها بعد ان انهت المكالمة, فألقت بالهاتف جانبا وتوجهت اليها في المطبخ.
ندى: ايوة يا ماما.
الام: تعالي يا حبيبتي حضري معايا العشا.
ندى: ما نسمة تقوم تحضر معاكي.
الام: انتي يا بنتي مالك ومال نسمة؟, وبعدين انا طلبت منك انتي.
ندى: يوووه, حاضر.
وتوجهت الى الثلاجة وفتحتها.
ندى: اطلع ايه؟.
الام: متطلعيش حاجة, قطعي طماطم صغيرة للشكشوكة وكبيرة للجبنة.
ندى: اووف ,حاضر. وقامت تعمل في ضجر.
ندى: اخيرا رحمتينا من التونة بتاعة الرجيم بتاعك, يعني انتي بتعملي ريجيم احنا مالنا.
الام: مش تشجعوني يا ولاد, ولا انتو بس تعدو تقوليلي تخنتي وتتريأو عليا.
ندى: انتي مش بتروحي جيم, كفاية عليكي, وبعدين فين دا الي تخنتي انتي رفيعة اصلا, مشفتيش مامة نهلة صاحبتي ولا مامة هايدي.
وساد صمت ,فقالت الام بعد فترة, دون ان تلتفت لابنتها.
الام: انتي كنتي بتتكلمي في التليفون؟.
ندى: لأ ,في الموبايل.
الام: وكنتي خارجة من اوضتك ليه؟, متكلمتيش جوة ليه؟.
ندى: عادي يعني.
الام: ممممم, ولا عشان نسمة قاعدى جوة؟.
قلقت ندى لتساؤلات الام.
ندى: عادي يا ماما. الام: انتي كنتي بتكلمي مين؟.
قالت ندى بعصبية.
ندى: ومن امتى بتسأليني يا ماما؟.
الام: وانتي من امتى بتردي عليا سؤال بسؤال؟.
فصمتت ندى وهي تقطع الطماطم في توتر.
الام: كنتي بتكلمي شادي؟.
ندى:...........
التفتت الام تنظر اليها.
الام: قوليلي يا حبيبتي ,احنا مش اصحاب؟.
ندى:...........
الام: انتي مش عايزة تحكيلي ليه؟, انا مش طول عمري صاحبتكو يا بنات وطول عمركو بتحكولي كل حاجة.
ندى: هي لحقت؟.
الام: هي مين.

ندى: هالة هانم, الي مبيتبلش في بقها فولة, قوام جريت عليكي تقولك.
الام: انا هالة مقالتليش حاجة, انا الي استنتجت لوحدي, وبعدين حتى لو قالتلي مش من حقي يعني اعرف انتي بتعملي ايه؟.
قالت بحدة. ندى: انا مبعملش حاجة.
فصمتت الام قليلا ثم عادت تقول بهدوء.
الام: وانتو بتتكلمو اصحاب عادي؟, صح؟.
ندى: اقلك بنتكلم في ايه كمان؟.
نظرت اليها الام في تفحص بينما اخذت هي يداها تحتدان في التقطيع.
الام: ولما انتي مبتعمليش حاجة, قاعدة تهربي من كل سؤال بسألهولك ليه؟.
وعادت لتحضير العشاء, بينما لم ترفع ندى عينيها عن الطماطم, حتى انهتها, وبينما هي تعطيها لامها, قالت الام.
الام: على العموم شادي ولد كويس ومؤدب وعارفينه, وانا عن نفسي بحبه.
تمتمت ندى وهي تخرج من المطبخ.

ندى: على الاقل احسن من عمرو مجدي الي طايرنلي بيه السما.

ندى برضه؟؟؟"
فزع شادي على صوت امه الغاضب من خلفه, فالتفت.
شادي: ماما؟, انتي واقفة ورايا من امتى؟.
تجاهلت الام السؤال وهي تقول بغضب.
الام: انت مش قلتلي مبتكلمش بنات اليومين دول, وخلاص سبت البت الصايعة الي اسمها هايدي زي ما قلتلك, ايه بقى حكاية ندى دي ان شاء الله؟, انت ناوي تضيع نفسك وانت لسه مدخلتش الكلية, ماهو هندسة وبنات مينفعش, روح بقى حولك تجارة ولا حقوق, واعرف بنات زي مانت عايز, لكن عايز تفلح في كليتك يبقى تنسى البنات خالص, انت عايز تضيع كل الي انت عملته طول عمرك.

لم يندهش شادي من شلال التعنيف الذي انهال عليه,فقال يحاول شادي استمالة والدته. شادي: مفيش حاجة يا ماما بينا صدقيني, انا مش عايز اضيع الي انا عملته ولا حاجة, وبعدين انتي عارفاني, مفيش حاجة عندي اهم من مذاكرتي.
الام: مش باين, انا كل يومين الاقيك بتكلملي بنت , مش تكبر وتعقل بقى , انت مبقتش صغير.
شادي: بس ندى انتي عارفاها.
الام: ايوة عارفاها مش بنت المهندس الي قدامنا, الي اختها ماشية مع الواد الصايع الي بيجي كل خميس بالعربية يشغل كاسيت تحت البيت, دول اشهر من نار على علم.
شادي: بس ندى غير اختها خالص, دي مؤدبة ومتربية.
الام: ولما هي مؤدبة ومتربية , بتكلمك ليه في التليفون, بنات اخر زمن, يبقو مؤدبين وهما بيكلمو الصبيان في التليفون.
قال شادي في شيء من اللوم.
شادي: بس يا ماما متقوليش عليها كده.
الام: كمان بتدافع عنها, انت عايز تنقطني.

قال في نفاذ صبر.
شادي: يعني انتي عايزة ايه دلوقتي؟
الام: انا عايزاك تفوق لنفسك , وتنسى البنات والقرف دا, انت بتعمل مستقبلك, وانا مش هخلي حد يضيعلي كل الي انا عملته,و لا حتى حتة بت مفعوصة زي دي. شادي: يا ماما انتي كل ما تشوفيني بكلم بنت تعمليلي كده, انا حر, انا كبرت ومسئول عن نفسي.
الام: لما تبقى تصرف على نفسك, يبقى ساعتها تقول انا مسئول , انت فاهم, لكن قبل كدة لأ.
شادي: ياربي ارحمني, دا بابا مبيعملش معايا كده.
قالت الام بدهشة.
الام: انت بتزعقلي عشانها؟, دلوقتي ابوك بقى احسن مني, هو هيخاف على مصلحتك قدي؟ ,ولا عارف انت بتعمل ايه ومبتعملش ايه؟.
تراجع شادي عن كلامه في سرعة حين رأى غضبها.
شادي: والله ما قصدي يا ماما, انا اسف, انتي عارفة كويس انك

اهم حاجة في حياتي كلها.
الام: ولما انا اهم حاجة مبتسمعش كلامي ليه؟.

شادي: منا سمعت كلامك وسبت هايدي, عايزة ايه تاني؟.
الام: انت كمان مكنتش عايز تسيبها؟, دي يا ابني كانت كل يومين تجيلك تحت البيت, هو فيه بنات كده.
شادي: والله يا ماما ندى دي غير هايدي خالص, انتي متعرفيهاش, لو عرفتيها هتحبيها.
الام: انا بحب ابني وعارفة مصلحته, وهو لو بيحبني هيسمع كلامي.
شادي: حاضر يا ماما ان شاء الله.
الام: انت بتقولي كده وخلاص.
شادي: خلاص بقى يا فريدة متزوديهاش.
الام: ماشي يا لمض, ربنا يستر عليك يا حبيبي انت وكل الشباب الكويسين الي زيك, ويبعد عنكو البنات والفشل يارب.

ههههههه حلوه موت القصه هو اى نعم اكيد كل ام بتخاف ع اولادها بس لو كل الامهات ضغطوا اوى كدا ع اولادهم هيحصل حاجتين مش ليهم تالت لا هننتحر لا هنروح نزور مستشفى المجانين فى العباسيه

انا بجد متشكرة ليك بجد يسلم ايدك ..........والقصة حلوة اوى اوى اوى ...........بس عايزة اقول حاجة ندى لو قبلت انها تحب او تصاحب شادى يبقى هى غيرت فكرتى عنها تماما..لانالبنت المحترمة المفروض انها مش بتصاحب ولاد.............انا اسفة طولت عليك..........شكرا
_________________________________________
لا تحزن على شىء.......... ذهب لانه لن يعود ثانيا

ههههههههههههه مش هقدر ارد عليكى عشان لو رديت هبقى حرقتلك القصه......

الحلقة العاشرة


سار شادي بجانب ندى في الشارع, بعد خروجها من الدرس,بينما سارت هي متباعدة قليلا شاعرة بشيء من الحرج.
ندى: انت كنت فين امبارح؟.
شادي: كنت عند عمتي.
ندى: طب مكلمتنيش ليه؟. شادي: كنت مشغول يا ندى, مخدتش بالي.
ندى: يعني مخدتش بالك تبعتلي حتى مسدج تطمني عليك؟, انا قعدت استنى طول الليل , وبعد ماروحت متكلمتش برضه.
تذكر شادي كيف حاصرته امه في البيت لكي لا يستطيع الافلات والتحدث معها.
ندى: اديك بتنساني اهه, وانت لما انا بنساك بتعملي شغلانة, وبتبقى خناقة. شادي: يا حبيبتي انا مقدرش انساكي, انا بس اتشغلت عنك شوية, معلش مش هتحصل تاني.
قالت ندى بحزن.
ندى: ياريت.
فقال بقلق.
شادي: مالك يا ندى؟. ندى: انا خايفة يا شادي, خايفة تكون مبتحبنيش وتعمل زي ما عملت في هايدي, وتهملني وتسيبني , وانت عارف ان انا بقيت بحبك خلاص, تقوم تقوى عليا.
شادي: لا والله يا نودي , انا بحبك جدا ومقدرش اني اقوى عليكي.
صمتت ندى واطرقت برأسها ,فدنا منها شادي , ومد كفه برفق ليلمس كفها, فارتعشت هي في باديء الامر, ثم تركته يمسك كفها, سارا فترة دون حديث, الى ان قالت ندى.
ندى: شادي, اوعى لما تروح الكلية تحب واحدة تانية.
شادي: انتي مالك ياندى خايفة مني كده ليه؟.

ندى: انا مش خايفة منك, انا بس.........هوووف.
شادي: قولي يا ندى الي في بالك, قوليلي اي حاجة انتي بتفكري فيها , متخافيش مني, انا عايزك تعتبريني كل حاجة, صاحبك واخوكي وحبيبك, انا عايز اكون اقرب حد ليكي في الدنيا يا ندى.
صمتت ندى قليلا ثم قالت.
ندى: انا خايفة من اي حاجة ممكن تسيبنا بعض, خايفة لتزهق مني ومن الدبش بتاعي في الكلام.
شادي: يا حبيبتي محدش بيزهق ابدا من الصراحة.
ندى: حتى لو لقيت في الكلية بنات احلى مني؟. ضحك شادي.
شادي: انتي عسل يا حبيبتي والله.
ندى: انا خايفة بعد ما تكون انت كل حاجة في حياتي تبعد عني.
ضغط على كفها برفق وقال برقة.
شادي: متخافيش يا حبيبتي انا مش هسيبك ابدا ابدا ابدا.
قالت ببرائة. ندى: حتى لو موتوك؟.
ضحك.
شادي: حتى لو موتوني.
ندى: حتى لو باباك مش عايز؟.
شادي: حتى لو بابايا مش عايز؟.
ندى: حتى لو مامتك مش عايزة؟. شادي: وبعدين بقى يا ندى ,انتي هتعديلي الاحتمالات كلها, مش هسيبك يا ستي, مش هسيبك , انا بموت فيكي انتي ,معنديش مشكلة اموت عشانك, لاني لو بعدت عنك اصلا كده كده هموت.
دخلت ندى بيتها لتجد هايدي جالسة مع اختها في حجرتهما ,بمجرد ان دخلت التفتت اليها هايدي تنظر لها شذرا.
ندى: هاي يا ديدو, ازيك.
هايدي: احسن منك.
قالت ندى بقلق.
ندى: مالك؟.
هايدي: مش طايقاكي.
ندى: ليه يعني؟.
التفتت تهتف بها.
هايدي: ولما انتي ماشية مع الزفت الي اسمه شادي يا معفنة, مقلتليش ليه, وسايباني قاعدة اتكلم قدامكو واقول بارد ومش بارد, ومبيعبرنيش, انتي واختك اللا دي.
انزعجت ندى.
ندى: وانتي ايه الي عرفك؟.
ونظرت الى اختها بغضب, فقالت هالة في سرعة ممازحة. هالة: والله العظيم ماقلتلها حاجة, هي الي شافتكو يا فالحة ماشيين على اول الشارع وهي جاية, ماسكين ادين بعض.
احمر وجه ندى خجلا, وهي تسمع الوصف.
ندى: ياسلام؟.
هايدي: انا شادي بتاعك دا ميلزمنيش في حاجة, بس انتي طلعتي واطية, واختك لاة , ومعرفتونيش يا جزم, بس, على العموم يغور بمامته, دي ست فظيعة هتطلع عينك ان شاء الله, وهو كمان عيل خنيق.
ندى: بس يا هايدي متتكلميش عليه كده لو سمحتي.
وخرجت من الغرفة في غضب لتدخل غرفة نسمة, فقالت هايدي في سخرية. هايدي: مالها دي؟.
هالة: اسكتي لحسن بتحبه بجد بهبلها دا كله.
هايدي: هي الي جابته لنفسها , والله امه دي ما تتعاشرش.
هالة: سيبك منها, احكيلي ايه اخبار حمادة.
هايدي: اسكتي مش شفت امنية امبار قدام ماك.
بينما في هذه الاثناء قالت نسمة لندى.
نسمة: مالك ؟؟.
جلست على طرف السرير تبكي.
ندى: هايدي عرفت ان انا وشادي بنحب بعض.
قالت نسمة بسخرية.
نسمة: ما كل الدنيا عرفت , وماما عرفت , ومش بعيد يجوزوكو لبعض عشان يلمو الفضيحة اصلا.

ندى: بس يا نسمة, انا مش ناقصة تريأة, واختك الغبية دي كمان وصاحبتها, طيب يا هالة, انا مش هحكيلك حاجة تاني ابدا.
نسمة: يعني هتبقي تحكيلي انا؟.
ندى: ولا هحكيلك انتي كمان عشان انتي برضه بتعدي تغلطيني.
نسمة: يا سبحان الله , انتي مش عايزة حد ينصحك ابدا؟, انتي عايزة تعيشي في الدنيا لوحدك؟.
اكملت ندى في مكابرة.
ندى: ايه يعني لما احب شادي؟, ما كل الناس بتحب, انا كان نفسي احب من زمان, وبحب شادي, ايوة بحبه, ولا انتي ولا هايدي ولا حد هيخليني اسيبه انتو فاهمين؟.
وقامت بعصبية تغادر غرفة نسمة التي قالت. نسمة: ايه المجنونة دي هو حد كلمها؟.
هاني: هي مش ندى دي الي اختها نسمة؟.
شادي: ايوة.
هاني: الحلوة ام عنين عسلي فاتح دي؟.
شادي: باين ,انا مشفتهاش اوي, مخدتش بالي.
هاني: هي تينشن اوي بس حلوة, متظبطني يا شود.
شادي: لا ياخويا انا ماليش دعوة بيك.
هاني: ايه يعني, ظبطني.
شادي: ياد يخرب بيت سنينك انت لسه صغير, وبعدين امك لو عرفت هتطين عشتك وعيشتي, انت ناسي عملت فيا ايه عشان ندى.
هاني: وهي ايه الي هيعرفها بس.

شادي: اهي امك دي عاملة زي امن الدولة, بتعرف كل حاجة متعرفش ازاي؟.
ضحك هاني وهو يقول.
هاني: فاكر لما قفشتك بتدخن فوق السطح , وقلبت الدنيا فوق دماغك شهرين, وكنت هتموت وتعرف ايه الي عرفها انك فوق.
شادي: بس يازفت متفكرنيش,اعوذ بالله, بس انا كنت صغير وقتها, انا دلوقتي كبير وحر, ومش كل شوية تحرجني مع بنت كده, انا مبقتش عيل .
هاني: انا بقى عيل, تحرجني زي ماهي عايزة, على الاقل اعرف اخلع براحتي من البنات.
شادي: يا شيخ روح, اصلك فاضي وهايف.
هاني: مقلتليش برضة هتظبطني ولا لأ؟.
شادي: مفتكرش البت ترضى اصلا.
هاني: ليه يا بني؟ ,دانت اخوك جامد برضة.

شادي: هبقى اشوف.
هاني: انت بتحب البت الي اسمها ندى دي بجد؟.
شادي: ايوة.
هاني: بجد ؟؟.
شادي: ايوة بجد ,ايه الغريب في كده؟.
هاني: مش عارف, حاسس انكو مش لايقين على بعض.
شادي: بالعكس ,انا ماستريحتش في حياتي مع بنت زي ما استريحتلها, انا فعلا بحبها يا هاني, ومفيش حد ممكن يبعدني عنها.
هاني: حتى ماما؟؟؟؟.
شادي: .....مش عارف, بس مفتكرش برضة.
هاني: ربنا يبعد عننا ماما دي الي واقفلنا في كل حاجة.

الفصل الثانى

الحلقة الاول


ندى: انا عايزة اجيلكو الكلية مرة.
شادي: منا قلتلك الخميس الي فات تعالي مع هالة, انتي الي مرضتيش.
ندى: والله كان عندي امتحان بيولوجي في الدرس, مكانش ينفع اجي.
شادي: طيب ابقى تعالي مع هالة بقى, حتى اعرفك على سامح صاحبي, دا هيموت ويشوفك.
قالت بلهجة ذات مغزى. ندى: وتعرفني على ريكا ولومي بالمرة.
شادي: يا بنتي هحلفلك للمرة الالف انهما اصحابي عادي في الشلة, طب دانا اقل واحد عنده اصحاب بنات في شلته , وريهام وسلمى دول بنات محترمة جدا, لما تيجي والله لعرفك عليهم وانتي هتشوفي بنفسك.
وفكر " وهو انا اقدر اصاحب بنات كتير , دي ماما كانت فضحتني". ندى: اشمعني انا ماليش اصحاب ولاد؟.
شادي: ومين قال ان ممكن يكونلك اصحاب ولاد اصلا؟, هو انا شوال جوافة مثلا؟.
ندى: شفت , شفت انت بتتعصب ازاي لما بجيب السيرة, لكن انا ماليش حق اغير او ازعل.
شادي: لا يا ماما , انتي حاجة وانا حاجة, انتي بنت, وبعدين هو انا مش مكفيكي ولا ايه؟.
ندى: يعني هو انا مش مكفياك؟.
شادي: انتي بتستعيلي معايا كتير وبتتغابي في حاجات هايفة, اسألي اختك يا ستي , انا لو ليا صحاب غير ريكا ولومي , ابقي تعالي كلميني.
تراجعت ندى امام غضبه , وقالت بدلال.
ندى: منا عارفة يا حبيبي والله, بس انا بحب اغير عليك , بلاش يعني؟.
شادي: لا ياندى, انتي كده مش بتغيري انتي كده بتخنقيني. ندى: انا بخنقك عشان بحبك؟.
شادي: متبقيش شكاكة كده على طول , انا مش مضطر اكدب عليكي اصلا.
ندى: انا شكاكة؟, طب دانا سايباك على راحتك جدا, انت مشفتش البنات بيعملو ايه مع الي بيحبوهم.
شادي: بقلك ايه يا ندى, انا اصلا مش فاضي وطالع عيني في ام المشروع الي بشتغل فيه دا, روحي , روحي ذاكري عشان معطلكيش.
ندى: استنى يا شادي مش كل ما اكلمك تقفش عليا كده, فيه ايه الي حصل يعني؟.
شادي: مانا كل ما اكلمك الاقيكي بتخنقي فيا وانا مش طالبة معايا خنقة يا ندى النهاردة. ندى: منا الي كل ما اكلمك الاقيك مشغول في حاجة , مشروع او كورس اوعندك كويز او اي مصيبة تانية, اعمل ايه يعني؟, مانا عارفة الي فيها , ماهالة اهي زيها زيك ومش مشغولة الشغلة الي انت فيها دي يعني.
شادي: والله مش مشكلتي ان اختك بتحب تزنق نفسها على اخر وقت .
ندى: يا سلام وانت بقى الي داخل من اولها معيد في الكلية.
شادي: بصي يا ندى, انا ورايا سهر للصبح على المشروع, روحي اقرفي في حد غيري لو سمحتي.
ندى: استنى هنا يا شادي ,انت هتقفل وتسيبني كده وانت مزعلني.
شادي: اللهم طولك يا روح, عايزة ايه؟, انتي عايزة ايه دلوقتي؟, والله العظيم عندي شغل, وانتي كمان عندك مذاكرة, روحي ذاكري يا ندى وبكرة نتكلم.
ندى: لا مش هروح, ومش هذاكر, الا لما تصالحني وتضحك وتقولي انك بتحبني كمان.
شادي: والله انا مافايق يا ندى خالص.
ندى: وانا مش هسيبك تقفل وانت زعلان مني. قال باقتضاب.
شادي: حاضر يا ندى, انتي عارفة ان انا بحبك, متزعليش مني, معلش.
ندى: واضحك بقى.
شادي: حاضر اهه, هههه, حلو كده, يلا بقى عشان ماما متقمش تلاقيني بتكلم في التليفون.
ندى: ماشي يا حبيبي, فكر فيا وانت بتشتغل, ماشي؟.
شادي: حاضر.
ندى: وانا قبل مانام هرن عليك.
شادي: طيب يا حبيبتي.
ندى: باي. شادي: مع السلامة.
سامح: بس انتي مش زي ما كنت متخيلك خالص.
ندى: كنت متخيلني ازاي يعني؟.
سامح: يعني , مش مهم المهم ان انتي غير .
ندى: احسن ولا اوحش يعني؟.
ضحك قائلا.
سامح: لا متخافيش احسن.
شادي: اديكي شفتي يا ستي سامح الي ليل نهار تسمعي عنه, توأم روحي زي ما بتقولي.
ندى: امال فين ريكا ولومي؟.
اقبلت عليها فتاة جميلة مبتسمة , محجبة , وتوقفت امامها تنظر في فضول, وقالت برقة.
سلمى: ندى؟.
قالت ندى في حرج.
ندى: ايوة.

سلمت عليها الفتاة بحرارة.
سلمى: انا سلمى زميلة شادي, انا سمعت عنك كتير اوي, من شادي ومن هالة كمان.
قالت ندى من بين اسنانها.
ندى: وانا كمان, انتي لومي صح؟.
سلمي: ايوة انا, وريكا جاية في الطريق, انتي قاعدة معانا النهاردة صح؟, اكيد هتشوفيها.
شعرت ندى ببعض الود للفتاة, فقالت.
ندى: انتي عسولة اوي.
ضحكت سلمى برقة تضايقت لها ندى,وهي تقول.
ندى: وانتي فعلا زي ما بيقولو عنك الي في قلبك على لسانك, انتي الي عسولة يا حبيبة قلبي.
سامح: تعالي يا لومي نروح نشوف العيال داخلين المحاضرة ولا لأ؟, انت طبعا مش معانا النهاردة يا شود. شادي: على عيني يا موحا انت عارف, بس ابقى انت ظبطني وفهمني الي الراجل قاله.
سامح: ولا يهمك, واكتبلك اسمك في الغياب كمان لو حبيت.
وتركاهما وانصرفا.
شادي: انتي عارفة ان دي اول مرة اطنش محاضرة.
ندى: اخص عليا , كده انا مفشلاك
شادي: ولا يهمك, ايه رأيك في لومي, عسل صح؟, ومحترمة اوي.
ندى: اه شكلها لذيذ.
شادي: هتشوفي ريكا بقى, شفتي لومي حلوة وهادية ازاي, اهي ريكا دي حاجة تانية خالص, وشعنونة ولا الصبيان.
اقبلت في هذه اللحظة ريهام, فتاة سمراء , مع ملامح رقيقة عادية, ولكن صوتها عال,قالت من بعيد وهي تقترب.
ريهام: الواد شادي واقف برة ليه؟, مش فيه محاضرة دلوقتي؟, طب انا وضايعة وعارفين, انت يا دحيح واقف هنا ليه؟. تلفت شادي حوله وهو يقول.
شادي: اخرسي, صوتك عالي الله يحرقك , مش هتبطلي الفضايح دي؟.
ريهام: ومين الي معاك دي؟.
شادي: بس يا بنتي وطي صوتك دا؟.
اقتربت وسلمت على ندى وكأنها تعرفها منذ زمن.
ريهام: اكيد ندى, عرفتك من صورتك الي معاه, انا ريكا.
سلمت عليها ندى بحذر وهي تتمتم.
ندى: الحمد لله.
ريهام: هو محدش قدر عليه غيرك, اهو الواد دا عمره ما فوت محاضرة, وعلى طول الاول في المشاريع, انا بحقد عليه.
قال شادي بغيظ.
شادي: الله اكبر.

ريهام: شفتي وكمان بيخاف م الحسد, واقفة ليه تعالي نعد.
واخذتها من يدها وكأنها صديقتها , وجلستا في الكافيتيريا وتبعهما شادي, وقضت الوقت معهما الى ان انتهت المحاضرة وجاءت اختها وصديقاتها, وكذلك اصدقاء شادي, وشعرت ندى بجمال حياة الجامعة , وكذلك شعرت بالخطر على شادي.

ندى: يعني بس عيال زي العسل, بس شادي الغلس مسابنيش اعد معاهم, زعقلي عشان بهذر مع ايمن , قالي الواد دا متهذريش معاه تاني, مش كويس.
نسمة: ممممم, وايه كمان؟.
ندى: انتي بتتريأي ولا ايه؟.
نسمة: انا بسمع , يعني رحتي اتبسطتي يعني.
ندى: انتي مالك يا نسمة مبتحبيش احكيلك ليه؟.

نسمة: عشان انتي مش حاسة انك بتغلطي اصلا, يعني صاحبتي شادي ورحتي معاه الجامعة كأن عادي جدا انك تصاحبي ولد, يا حبيبة قلبي مش عشان هالة عاملة كده يبقى ليكي الحق انك تعملي كده ,وبعدين برضة مش عشان ماما عارفة يبقى انتي صح, انا مش عارفة ماما دي سيباكو كده ازاي؟, وموافقة عادي انك تدوري مع شادي, واختك تدور مع عمرو.
ندى: ماما؟, دي ماما دي عسل, امال عايزاها تبقى زي مامة شادي, عاملالنا حصار على طول.
نسمة: انا مش عارفة ازاي هي ساكتة عليكو اصلا, مش كده انها تكون صاحبتكو , مش كده , كده غلط.
ندى: انتي الي عبيطة ومش عارفة تصاحبيها, يا بنتي ماما مش هتعملك حاجة قربي منها واحكيلها.
نسمة: احكيلها ايه يا بنتي , الام ام برضة, مينفعش تكون صاحبة, انا عندي اصحاب, محتاجة امي تكون ام مش صاحبة هي كمان, تنصحني وتمنعني اقع في الغلط, مش تسيبني كده على راحتي.
ندى: يعني انتي عايزة ماما مثلا تضربني عشان بكلم شادي؟.
نسمة: لا , بس على الاقل تاخد منك موقف, او تفهمك ان دا غلط.
ندى: بس شادي مؤدب, وعارفينه عشان كده هي مطمنة, وبعدين انا بحبه اوي يا نسمة, ماما عشان كده سيباني.
عادت نسمة تدفن رأسها في مذكرة الرياضيات, وهي تتمتم.
نسمة: بحبه اوي, والتانية بتحبه اوي, وعارفينه, وكلكو واقعين في مصيبة وانتو ولا داريين.
ندى: انتي بس الي معقدة, خليكي كده, مش هتلاقي برص يبصلك.
نسمة: انا مش فاضية حد يبصلي , ومش عايزة حد يبصلي, انا عايزة اذاكر وانجح, واعيش حياتي صح, كل حاجة في وقتها, مسبقش الاحداث واخد حاجة مش من حقي؟. ندى: حاجة مش من حقك؟؟.
نسمة: اه, اني احب واحد وانا لسه مش باين هاخده ولا لأ, يبقى انا جيت على حق واحدة تانية ممكن تكون مراته, وانا جيت على حق واحد تاني ممكن يكون جوزي في يوم من الايام.
ندى: لااااااا, دانتي خنكة خالص.
نسمة: ربنا يهديكي انتي يا ندى, انتي لسه في الاول وممكن ترجعي في الي عملتيه, هالة انا فاقدة فيها الامل اصلا, بس انتي مسيرك تعرفي ان انا صح

فاصـــــل ونواصــــل

الحلقات دى جامدة اوى يا مصطفى .................ميرسيه ليك كتير..........
________________________________________
لا تحزن على شىء........ ذهب لانه لن يعود ثانيا

بسرعه كملها وخليك جدع بقى

الفصل التانى

الحلقة الثانية


توقف شادي يقول بحدة لندى.
شادي: لا يا ندى, لا , هايدي دي ملكيش دعوة بيها اصلا, لا تصاحبيها ولا تسلمي عليها حتى.
جذبته ندى من يده ليواصل السير .
ندى: اهدى بس وافهم, ازاي يعني مكلمهاش, دي صاحبة اختي من زمان ولسه صاحبتها لغاية دلوقتي, مينفعش متكلمش معاها.
شادي: البنت دي انا مش عايزك تعرفيها يا ندى.
ندى: الله يا شادي, انت يعني بتعجزني, مش تطلب حاجة انا اقدر اعملها, قلتلك مش هصاحبها, بس مينفعش يعني ادخل البيت الاقيها جوة مسلمش عليها.
شادي: وايه يعني؟, عشان تفهم انك مبتكلميهاش تقوم تبعد عنك.
ندى: يعني انا ممكن في مرة اجي اقلك متكلمش علي, مانا برضة مبطيقوش , وكان بيعاكسني قبل ما اعرفك, هترضى.
شادي: قلتلك ميت مرة متقارنيش نفسك بيا, انا حاجة وانتي حاجة.
ندى: لا بقى, انا زيي زيك, والمفروض تعاملني زي ما تحب اني اعاملك.
توقف شادي عن السير للمرة الثانية وهو يقول بغضب.
شادي: يعني انا معطل نفسي وسايب مشاريعي وحاجتي ومذاكرتي الي طالع عين اهلي فيها, عشان اجيلك واشوفك, عشان تخنقي عليا وتخلي مزاجي زي الزفت, زي كل مرة, انا غلطان ان انا جيت. قالت بحدة.
ندى: الله يا شادي, انت كل شوية تقفش وتتقمص, انا زهقت, انت على طول مزاجك زي الزفت مش مني ولا حاجة, مش كده يعني , انا كمان يا اخي عندي مذاكرة وقرف ودروس وثانوية عامة, بس بفضلك على كل دا, انت ليه دايما حاطط مصلحتك قبلي .
شادي: عشان المفروض الصح كده, الواحد يفكر في مصلحته والاولويات , بس انا سبت كل دا ونزلت اشوفك وبرضة بتتخانقي معايا.
ندى: يعني انت عايز تقنعني انك مبتنزلش تخرج مع اصحابك؟, انت هتذلني عشان نزلت تشوفني بعد ماكنت هبوس رجلك عشان اشوفك, مانتاش الوحيد الي دخل هندسة يعني , ومحدش واخد الدنيا على اعصابه زيك كده, عايز تروح يا سيدي روح , كمل حاجتك وذاكر لحسن انا معطلاك. شادي: ندى انتي مبتقدريش انا مشغول قد ايه, وعلى طول فاكراني فاضي زيك.
قالت بغيظ.
ندى: فعلا انا الي عندي ثانوية عامة فاضية, طب عن اذنك بقى عشان اروح اذاكر , انا الي غلطانة اني ببقيك انت على مذاكرتي ومعتبراك اهم حاجة عندي.
شادي: بقى كده.
والتفت وانصرف في غضب بينما هي سارت في الاتجاة الاخر بسرعة.

جلست ندى في طرف سريرها تبكي, وبجانبها نسمة جالسة لا تواسيها ولاتكلمها, انما تنظر اليها في انتظار انتهاء بكائها, فدخلت هالة الحجرة في هذه اللحظة ولمحتها, فقالت بدهشة.
هالة: ايه دا بتعيطي ليه؟.
وجذبت نسمة من يدها بعيدا عنها وجلست مكانها.
هالة: قومي كده بدل مانتي قاعدة متنحة, بتعيط ليه دي؟.
وقفت نسمة وهي تعقد ساعديها امام صدرها.
نسمة: اتخانقت يا ستي مع شادي.
هالة: ليه كده؟, عملك ايه؟. قالت ندى من بين بكائها.
ندى: انا عملت ايه يعني؟, انا غلطانة اني بفضل اني اشوفه على مذاكرتي ومصلحتي, هو ليه كده دايما اناني؟, وبعدين مانتي في هندسة ومش مشغولة اربعة وعشرين ساعة زيه كده.
ضمتها هالة.
هالة: اهدي بس عشان تعرفي تفكري.
ندى: اهو زعل مني ومشي وسابني, كأنه بيقولي اضربي دماغك في الحيطة.
هالة: مشي وسابك ليه؟.
ندى: اصل انا زعقتله,وقلتله روح امشي يلا كمل مشاريعك وبلاويك.
هالة: انا مش فاهمة يعني انتي الي مزعلاه ولا هو الي مزعلك؟.
ندى: احنا الاتنين زعلنا بعض, بس دي اول مرة نتخانق وانا متضايقة ومش عارفة اعمل ايه؟. تدخلت نسمة قائلة لهالة.
نسمة: والهانم عندها امتحان في الدرس عربي بكرة, ومش عارفة تذاكر, قاعدة تعيط زي مانتي شايفة, منك لله يا شادي.
هالة: طب هو مكلمكيش من ساعتها؟.
ندى: خالص, ولا رن عليا حتى لما روح, ولا انا كمان, بقلك سابني في الشارع , سابني ارجع لوحدي.
هالة: طيب قومي اغسلي وشك واعدي ذاكري.
عادت تبكي بشدة.
ندى: مش قادرة, مش قادرة ابص في كتاب ولا اذاكر حاجة.
قالت نسمة بحدة

نسمة: انتي يا بنتي هتضيعي نفسك عشانه وهو ولا فارق معاه, سابك اصلا عشان يشوف مصلحته.
هالة: اسكتي انتي , عاملة زي الي بيحط بنزين على النار, احنا عايزين نهديها.
نسمة: هو كان قتلها؟,دا المفروض تفهم من نفسها ان لازم تبقى مذاكرتها ومستقبلها اهم من اي لعب عيال تاني.
اغتاظت هالة من نسمة حين اشتد بكاء ندى , فقامت تدفعها خارج الغرفة.
هالة: انتي بتعملي ايه هنا اصلا؟, روحي على اوضتك بدل مانتي واقفة تشعللي الدنيا وبس, يلا اتفضلي.
قالت نسمة وهي تخرج غصبا.
نسمة: خليكي كده ضيعيها معاكي, ان شاء الله بابا هيشوفك في مرة راكبة عربية عمرو وهيطربأها على دماغك.
دفعتها هالة واغلقت الباب بعنف خلفها وهي تقول.
هالة: ايه دا, البت دي لسانها دا ايه ؟, مش ممكن.
ثم عادت تجلس بجانب ندى تواسيها.
هالة: طب متحاولي تكلميه؟.

ندى: ينفع؟.
هالة: اه , كلميه عادي والكلام هيجيب بعضه هتتصالحو , عشان تعرفي تذاكري بس, لحسن كده مش هتذاكري حاجة.
مسحت ندى دموعها وهي تقول.
ندى: طب هاتيلي الموبايل من على التسريحة.
احضرته هالة , فأخذته واتصلت بشادي, وعاد وجهها يعبس,فقالت هالة .
هالة: هه؟, مبيردش ولا ايه؟.
ندى: لأ, مغلق.
هالة: طب كلميه على البيت.
ندى: لا اتكسف.
هالة: تتكسفي من ايه يا بنتي؟, كلميه عادي, استني اجيبلك التليفون من اوضة زفتة.
وذهبت لتحضر الهاتف من غرفة نسمة وعادت به, وناولت ندى السماعة.
هاله: ايه يا بنتي تتكسفي ليه؟, عادي.
ضربت ندى ارقام هاتف بيت شادي في توتر وانتظرت, الى ان سمعت صوت امه

الام: الو.
ندى: الو.
الام: ايوة؟.
ندى: لو سمحت ممكن اكلم شادي؟.
بدأ يظهر بعض الدهشة لمشوبة بالعداء في صوت الام.
الام: شادي؟, مين معايا؟.
ندى: انا..,انا ندى.
الام: ندى مين يا حبيبتي؟.
ارتبكت ندى اكثر, وتلعثمت.
ندى: انا....اخت ....هالة الي معاه في الكلية....الي ساكنة جمبكو.
فهمست هالة وهي تستنكر .
هالة: ايه دا هو تحقيق؟.
الام: وعايزاه في ايه يا ماما؟.
تضاعف ارتباك ندى ولم تدر بم تجبها.
ندى: في موضوع كده يا طنط.
ردت الام بلهجة عداء واضحة.
الام: اااااه, في موضوع, لا يا بنتي , شادي نايم دلوقتي, اصله عنده شغل في الكلية كتير, الله يكون في عونه, وانتي كمان يا حبيبتي مش المفروض تكوني بتذاكري دلوقتي, انتي عندك ثانوية عامة, ركزي يا ماما في مذاكرتك عشان ربنا يوفقك كدة وتدخلي كلية حلوة.
شعرت ندى بالكلام يتجمد على لسانها, فلم تتحدث بينما اردفت الام بنفس العداء.
الام: لما يبقى يصحى هبقى اعرفه انك اتكلمتي, ولو فضي يبقى يكلمك, يلا يا حبيبتي مع السلامة,....وابقي سلميلي على مامتك.
شعرت ندى نبرة السخرية في اخر جملة تخترق اذنها , فتسمرت امام السماعة التي يصدر منها صوت اغلاق الخط, فقالت هالة.
هالة: ايه فيه ايه؟, قفلت؟.
وضعت ندى السماعة في استسلام دون ان تتحدث.
هالة: فيه ايه؟.
ندى: امه.........., بهدلتني بالذوق.
هالة: ازاي يعني؟.
ندى: هزأتني يا هالة, قالتلي نايم وانتي المفروض تكوني بتذاكري دلوقتي.
وعادت تبكي مرة اخرى, فقالت هالة.
هالة: يادي النيلة ,ماهي هايدي قالت امه دي عقربة.
ندى: انتي خلتيني اتكلم على البيت ليه؟, انا كنت ناقصاها.
وعادت تبكي بشدة.

هالة: بس بس خلاص, سيبك منها دي ست خنيقة اصلا, المهم قومي بس اغسلي وشك واتعشي, وتعالي ذاكري, وانا لما اشوفه في الكلية بكرة هكلمهولك
ندى: انا لسه هستنى لبكرة؟.
هالة: وهو انا صحيح لو شفته كمان ممكن اشتمه, بس هكلمه كويس عشان خاطرك.
قالت ندى بأمل وكنها تذكرت شيئا.
ندى: طب استني انا ممكن اكلم لومي تصالحني عليه, هي صاحبته اوي, وهو بيسمع كلامها.
هالة: مابلاش يا بنتي ,متدخليش حد بينكو.
ندى: بس انتي لو اتدخلتي فعلا هتبقي في صفي, وكده ممكن نبوظ الدنيا, بس لومي صاحبتنا احنا الاتنين وهتحلها.
هالة: انتي حرة, كلميها بس على الله تحلها, انتي معاكي رقمها اصلا؟.
ندى: اه , هكلمها .
واتصلت بسلمى في لهفة.

الفصل الثانية

الحلقة الثالثة

اغلقت سلمى الهاتف ونظرت الى ريهام الجالسة امامها في الكافيه بصمت, فقالت ريهام بدهشة.

ريهام: كانت عايزة ايه؟.
وضعت سلمى الهاتف على المنضدة امامها وهي تتنهد, قبل ان ترفع كأس المشروب وترتشف منه , ثم قالت.
سلمى: اصلهم متخانقين, وكانت متصلة بيا عشان اصالحهم على بعض.
ريهام: وملقتش الا انتي الي تكلمك.

اعادت الكأس ببطء وهي مأخوذة
سلمى: شفتي بقى الحظ, عادي يا بنتي انا متعودة على كدة, هو اصلا طول اليوم مبيحكيش الا عليها.
ريهام: بصراحة يا لومي الي بتعمليه ده اكبر غلط, انا خايفة عليكي, ازاي تكوني بتحبيه وعاملة فيها انتيمته, طبعا هيحكيلك على صاحبته على طول.
سلمى: انا معنديش مشكلة انه يحكيلي, بس مكنتش متخيلة انها ممكن تخليني اصلح ما بينهم.
ريهام: انتي الي عملتي دا في نفسك, بتعذبي نفسك يا لومي.
تنهدت سلمى وترقرقت الدموع في عينيها بأسى.
سلمى: مفيش في ايدي حاجة تانية.
ريهام: لا فيه , يا تبعدي عنه, يا تعرفيه, ماهو مينفعش كده, انا مش فاهمة انتي مستنية مثلا يشم على ضهر ايده ويعرف انك بتحبيه؟, الولد مش واخد باله اصلا, ولو اخد باله هيعملك ايه, مانتي عارفة انه بيحب واحدة تانية, ابعدي عنه لحسن تتعلقي بيه اكتر
سلمى: ريكا , بالله عليكي تسكتي , يعني انتي فاكرة اني مش عارفة الكلام دا كله؟, انا عارفاه, بس اعمل ايه؟ , مش في ايدي حاجة, والله ما في ايدي حاجة, انا غصب عني لقيتني بتشدله وبحبه, حتى وانا عارفة انه بيعاملني كصاحبه مش اكتر, ومش قادرة غير اني اقرب منه اكتر.
نظرت اليها ريهام في شفقة.
ريهام: ربنا يستر عليكي يا لومي, انا بجد مش مستريحة للي بيحصل دا.

تنهدت سلمى للمرة الثالثة, واشاحت بوجهها عن ريهام وهي تفكر فيما قالته لها بحزن
شادي: الو ياندى, فيه ايه؟, قالبة الدنيا وبعتالي ميت مرسال ليه؟.
ندى: انت كنت قافل موبايلك ليه؟.
شادي: كنت بشتغل , ومكنتش عايز ازعاج, ايه الي حصل يعني؟.
ندى: امال مامتك قالتلي انك نايم يعني.
قال شادي بانزعاج.
شادي: وانتي كلمتي ماما فين؟.

ردت ندى بحذر
ندى: لما لقيت موبايلك مقفول, اتكلمت على البيت.
غضب شادي.
شادي: انتي ايه الي خلاكي تعملي كده؟, وانا اقول مالها قالبة عليا ليه؟, ربنا يسامحك يا شيخة انا كده مش هخلص, انا مش مفهمك انك متكلمنيش على البيت.

ندى: انت بتزعقلي انا ليه؟, انت الي كنت قافل موبايلك, انا غلطانة اني بعمل المستحيل عشان اكلمك ومسيبكش زعلان, مع انك انت الي غلطان فيا
وضع كفه على وجهه.
شادي: يا اللــــــه,تقومي تكلمي ماما يا ندى.
بدأت ندى في البكاء.
ندى: يعني انا كنت اعمل ايه؟, كنت عايزة اكلمك بأي طريقة, وهي كمان ماقالتلكش اني اتصلت.

صمت شادي لحظات ليهدأ, ثم قال
شادي: خلاص ياندى متعيطيش, ومتزعليش انا اسف, بس بعد كدة متكلمنيش على البيت تاني الا اذا كان فيه حاجة ضروري اوي.
تنهنهت ندى وهي تقول.
ندى: حاضر.

فصمت قليلا ثم قال
شادي: ايه الي خلاكي تكلمي سلمى؟.
ندى: اعمل ايه يعني؟, منا كنت زعلانة اوي ومعرفتش انام ولا اكل ولا اذاكر امبارح خالص.
شادي: انتي عندك امتحان النهاردة في الدرس صح؟.


ندى: يعني فاكر اهه
شادي: انا مبنساكيش اصلا يا حبيبتي.
ندى: امال عملت فيا كده ليه؟, وسبتني امبارح اخبط دماغي في الحيطة.

شادي: انا كنت متنرفز منك شوية , فبلاش كنا نتكلم وانا زعلان, قلت نسيب بعض نهدى حبة, ونبقى نتكلم, بس مكنتش عارف انك مجنونة وهتقلبي عليا الدنيا
ندى: مانت واخدني مجنونة, انا مكنتش قلتلك ان انا عاقلة.
شادي: خلاص يا حبيبتي متزعليش وقومي ذاكري شوية قبل الدرس.
ندى: ماخلاص , مش فارقة بقى, كان زماني ذاكرت امبارح.
شادي: لا يا نيدو يا روح قلبي لازم تذاكي, انتي شاطرة وانا عارف هتلحقي تذاكري, قومي يلا.

ندى: حاضر
شادي: بحبك يا مجنونة.
ندى: وانا كمان يا دودو , اوعى تقفل موبايلك تاني, وتعذبني عليك كدا تاني.
شادي: حاضر يا حبيبتي, يلا سلام.

ندى: باي.
واغلق الهاتف والتفت فنظرت اليه سلمى وهي تقول بلهفة هادئة.
سلمى: ايه؟, اتصالحتو؟.
شادي: دي هي هبلة اصلا, احنا مكناش اتخانقنا عشان كل دا, انا بس كنت متضايق ومبحبش حد يزعجني وانا مركز مانتي عرفاني.
ردت بأسف مخفي.


سلمى: اه عرفاك
شادي: بس هي كانت هتموت نفسها , مذاكرتش وهيا عندها امتحان النهادرة.
سلمى: بس هي,.....شكلها بتحبك اوي.
شادي: اوي, وانا كمان بحبها اوي, بس مش بطريقتها دي, كده هي بتيجي على حق حاجات كتير اوي باسم الحب, ومجنونة في تصرفاتها ,المفروض تبقى اعقل من كدا.
سلمى: صدقني الواحدة لما بتحب ممكن تعمل حاجات غريبة جدا, انت ممكن متتصورهاش حتى, والعقل دا بيبقى اخر حاجة بتستخدمها.
شادي: لا مش كده, مفيش بنات كده.
ردت بحزن.
سلمى: صدقني فيه , واكتر من كده كمان.

وسارا جنبا الى جنب , كل غارق في افكاره
نسمة: تتحسدي, ماسكة الملزمة يعني ونازلة مذاكرة.
ندى: عندي امتحان.
نسمة: لا والله؟, ولسه فاكرة دلوقتي؟.
ندى: يا نيسو يا حبيبتي انتي مش فاهمة ولا عمرك هتفهمي, وانا كمان كنت زيك كده فاكرة, لما كنت اعد اقول لهالة, انتي هبلة وكده , قالتلي لما تحبي هتعرفي, والله انا مفهمتش الا لما حبيت شادي.
جلست نسمة في هدوء, وهي تقول.

نسمة: بصي يا ندى, انا قلتلك وهفضل اقلك انتي بالذات, الي انتي فيه دا مش حب, احنا لسه صغيرين, وبعدين انتي مجنونة في علاقتك بيه بالمنظر دا, ازاي يعني واحد توقفي كل حياتك عليه, لو متكلمتوش متعرفيش تذاكري او تاكلي, دي مش طريقة دي
ندى: يا نسمة يا حبيبتي , لما تحبي هتعرفي يعني ايه انك مش لوحدك, انك دايما حاسة ان فيه جزء منك في مكان تاني مع حد تاني, وازاي مبتبقيش قادرة تعيشي من غير الجزء دا,لو بعد عنك لحظة , ازاي تبقي حتى النفس مش قادرة تاخديه طول مانتو مش مع بعض.

نسمة: مين حمار فهمك كده, انا اعرف ان الحب بيكون مشاركة مش حد اخد جزء مني ومشي, وان الحد دا يكون قريب وموجود , ومع بعض في حلال ربنا , ويساعدني ويشجعني على مصلحتي لانها اهم عنده من مصلحته هو, ويشجعني على اني اكون احسن
ندى: طيب ما شادي بيشجعني على المذاكرة دايما وعايزني اتحجب كمان.
نسمة: دا مش حب, دي انانية منه عشان يبرر ازاي هو بيحب مصلحته اكتر منك, وبعدين لما يخليكي تتحجبي لااسبابه العجيبة, طريقة لبسك وعشان الناس ميبصولكيش, دا برضة مش عشانك دا عشانه هو, مش عشان الصح.

ندى: طيب انتي يعني لما اتحجبتي , اتحجبتي للصح؟.
نسمة: امال عشان ايه؟, عشان انا المفروض اعمل كده من غير ما يكون حد هو الي قايلي , او عشان مزعلش الي انا بحبه, يا بنتي حطي اولويات , ربنا ,اهلي , مذاكرتي, شادي, مش تقلبيها كلها من ورا.
ندى: انتي برضة مش فاهمة عشان مجربتيش.
نسمة: انا مش عايزة اجرب , من الي شفته منكو مش عايزة اجرب, انتي فاكرة ان عمرو مجدي هيخطب اختك في الاخر؟,بيتهيألك, عمرو دا انا شفته واتكلمت معاه في عيد ميلاد بنت خاله , و مكانش عارف انها انا اخت هالة, مكانش فاكرني, كنت لسه متحجبة ومعرفنيش, احلفلك بايه انه كان بيعاكس, وكان هيموت ويديني نمرة تليفونه, وانا مرضتش احرجه واقوله انا اخت هالة, ومرضتش اقول لهالة عشان هتقول عليا ببالغ وبألف وهتصدقه لو قالها ايه, بصي يا ندى, انتي عارفة انا بحبك قد ايه, وانتي اقرب الناس ليا , فانا مش عايزة اشوف شادي دا بياخدك مني ومن نفسك وبيضيعك حتى لو باسم الحب, الي بيحب حد, بيحترمه, والي يكلمك من ورا الاهل يبقى مش بيحترمك

قالت بعناد.
ندى: هو مبيكلمنيش من ورا اهلي, ماما عارفة.
نسمه: وياترى مامته عارفة؟.
ارتبكت ندى وهي تقول.

ندى: اكيد عارفة
نسمة: اقولك انا مامته عارفة ايه, عارفة ان شادي بيكلم بنت صايعة واخداه من مذاكرته وبينزل يقابلها من ورا اهلها, او مصيبة لتكون عارفة ان اهلك عارفين كمان , كده احنا بقى منظرنا وحش اوي.
ندى: بس يا نسمة اسكتي, مهما عملتي مش هتخليني اكره شادي.
نسمة: انا مقلتلكيش اكرهيه, انا قلت حبي نفسك شوية, حبي اهلك حبي ربنا, شادي دا مش كل حاجة ومش باقيلك زي مانتي متخيلة.

ندى: متقوليش كده
نسمة: انا عارفة اني بكلامي معاكي بقول كلام في الهوا , وانتي حرة تدخلي من هنا وتطلعي من هنا, بس انا مش هسكت وهفضل اقولك طول منا عايشة , عشان ان لسه عندي امل فيكي.

ندى: بقلك ايه يا نسمة, متعمليليش فيها داعية, انتي ملمومة على شوية بنات اليومين دول هيبوظولك دماغك
نسمة: انا قلتلك وانتي الي عندك اعمليه, ربنا يهديكي.
ندى: خليكي في حالك, انا بحب شادي واستحالة اسيبه