الخاتم دا ميلزمنيش

[center]الخاتم دا ميلزمنيش
~8~ ~8~ ~8~ ~8~

من بعيد لبعيد

انا بحب البساطه حتى في اكسسواراتي...وغالبا لما بنزل اشتري ذهب ماما وبابا بيتجنوا مني يابنتي هاتى حاجه توزن يابنتي على كدا هنلم تلاته اربعه من عينة ذوقك دا علشان نوزن يابنتي ارحمينا

وانا لا أبالى فلتحيا البساطه

واغيب اغيب الاقي واحده تقولى شيك خاتمك دا....بس مش صغير

أقولها لا ابدا مقاسي وربنا

وزيماتكون كل الاذواق البسيطه تدي على دبل...سبحانك يارب

آخر خاتم دا....كل اللي يشوفني بيه...مبرووك اتخطبتي امته

او....ماشاء الله انتى متجوزة بقى...عندك اولاد...ولاعروسه جديده..

ولقيت ان تنوع الاسئله في حد ذاته شئ جميل لذلك قررت اثبت على مبدأى ويوم البسه يمين ويوم شمال

لحد اما الناس تلاحظ انى بتخطب واتجوز وافسخ وهكذا

تعالوا نقرب شويه

فعلا شعور حلو وجميل ياسلاااام دا الخاتم دا مريح بجد .... بس مين اريح الدبله القديمه ولا الدبله الجديده دي
وبعدين فعلا الاخ المحبس دا بيحبس الدم وخانق الصباع

بس حقيقي الدبله دي لو بتتباع كدا للى عاوز ومش لازم اما ألبسها حد يقولى مبروك او امتى الفرح
كان الواحد اشترى له منها...مناسبه لكل المناسبات للسهرات والشغل والفسح
واسمها دهب

لعنة الدهب ولا لعنة الحوب

مش عارفه بصراحه...من اول يوم تتلبس فيه الدبله دي وانت تلاحظ ملاك بدل الانثى ....صوت رقيق ، لبس شيك ، مشيه هاديه ، نكت وهزار وضحك وفرفشه
والاجمل الجاتوه مش بيخلص من البيت

وفجأه تلاقي زعابيب امشير...وتليفون البيت اللى مكنش بيرن ماخلاص راحت عليه وتيجي ترد وانت متهلل الاسارير ان تليفون بيتك بيرن تلاقي :..قولى للدبله الحريمي بتاعتى اللى عندك ترد على...قافله موبايلها ليه

حاضر يا ابيه حالاااا

تروح للدبله تقولها خطيبك قصدى الدبله الرجالى اتصلت بتقوك افتحى موبايلك

مش فاتحه هه...براااحتي اصلا

والحل ألبس ولا اقلع

دلوقت يعني هو الرباط المقدس دا لازمه دبله ومحبس ولاممكن عادي كدا ربنا يالف بين قلبيهما والف مبروك وبالرفاء والبنين

بس شكلها لازم..أصلها اول حاجه بيتفقوا عليها الاتنين

وآخر حاجه بيتخانقوا عليها الاتنين

أنا كنت بحبها أوى ....اصلها شبه ذوقي شيك وبسيطه

الشئ بالشئ يذكر

اللى اعرفه من الستين سنه اللى عشتهم في الدنيا دي...ان لما ترتبط حاجه رقيقه بحاجه مجهوله لازم الموضوع يقلب برقه ولطافه

امال ليه بقى بتقلب الحكايه لمباره بين الجزائر ومصر على الرغم ان كلا المنتخبين لافراد مصريين

العيب في مين في مصر ولا في الجزائر

قصدي في مصر ولا في مصر

وأخيرا صارحوني...

أ(متزوجه) : الجواز دا جميل بجد...جميل في تكامل المشاعر بين الطرفين...جميل في احاسيسه ..جميل لما تلاقي حد بيقلق عليكي كدا وبيخاف عليكي كدا
ب(على باب الله):"في سرها" انا بابا بيقلق على وماما احاسيسها حلوة مصره تعلمنى ازاى اقشر التوم وازاى احمر الفراخ...عادي يعني

أ(متزوجه) : هو اى نعم الجواز له عيوبه ..لا لا عيوب ايه...يعني صعوباته ان كل المسئوليه عليكي ومينفعش تطلعي عيله...لازم تتحملى

ب(على باب الله):"في سرها برده"
لاء بقى كدا بابا وماما غشوني...من دلوقت بيحملوني المسئوليه..لازم تذاكري لازم تنجحي..لازم تروحي المناسبه دي....لازم تاخدي بالك من اخواتك وخليني بس اقول مليش نفس
جه قطع نفسي

النهااايه

أكيد مش هنقول زي الافلام العربي منى واحمد اتجوزوا

ولا هنلحق الطياره ورجل في الهوا ورجل في الارض

ولاهيجي البوليس ويلحق رئيس العصابه قبل مايهرب

بإختصار

قررت لا احب الدهب ولا احب البساطه

مالها الفضه

دي حتى فال خير[/center]

مرسي ليكي علي موضوعك الجميل

هههههههههههههههههه
حلوة الدبلة الرجالي دي
ميرسي يا امنيات

سعيده لمروركم واعجابكم بالموضوع

جميلة اوى يا امنيات

متشكرة يا دودو على اهتمامك..واعجابك بالموضوع

انت فين من زماااااان
حرمانا ليه من ابداعاتك يا استاذة