وبعدين ..... إيه الحل؟!!!

تيست

تيست

تيست

شيك تيست

ها المايك مظبوط ياجماعة؟؟؟؟؟؟؟؟

الصوت واصل عندكم ولا لاء؟؟؟؟


طيب طيب تمام تمااااااام


نسيتوني كنت هقول ايه


اه اه افتكرت




دلوقتي يا جماعة احنا قعدنا فى المنتدى دة كتير...
مننا اللي قعد سنين واللي قعد شهور واللي قعد ايام ومننا من خرج ولم يعد وتاه مننا في بحور النت السحيقة

وسيبناه وحيد


وروحنا هذا الوغد المسمي الفتيس بوك الهي يولع بجاز


وانا متأكد ان كلكم ما ارتاحتوش زي ما أنا ما ارتحتش فيه
وعلى فكرة أنا ناوى أهد الحيطة بتاعتى قريب

لا أخفيكم سرا أن هذا الفيس بوء جمعنى بأصدقاء وزملاء لي انقطعت صلتى بهم من سنين
ولكن خلاص انا اخدت أرقام موبايلاتهم والتواصل أصبح حقيقي موش افتراضي



مش هقول نفسي نرجع زي الأول لأن ده صعب


بس عالأقل لما نتجمع كلنا أو معظمنا تاني في نفس المكان اللي بنيناه سويا
أكيد أكيد ممكن نرجع أحسن من الأول بكتير لأن غيابنا عن المنتدى حسسنا بقيمته


أرجوكم أرجوكم أرجوكم

اهتموا بالمنتدى شوية وادوه ولو نص ساعة فاليوم
أنا عارف أننى من أول المقصرين في حقه والله

وكل واحد يعرف حد كان في المنتدى يقول له انه لازم يرجع
وانا متأكد ان محدش هيرفض يرجع المكان اللي عرفنا فيه أحسن ناس بجد

بس عشان نعمل كده لازم يكون في اقتراحات ننشط بيها المنتدى من تاني
لأن المنتدى عشان نوصله للقمة تاني أكيد هنحتاج مجهود مضاعف


وأنا بقول أول اقتراح اهو أننا نعمل مواضيع كتيرة أسرية...
يعني مثلا نعمل موضوع مثلا نسميه ( صباح الخير) او ما شابه

نتجمع فيه كلنا. مش عايزين نتفرق وكل واحد يبقي في حتة تاني
واللى عمل موضوع جديد يدينا الرابط واحنا نروح نشارك فيه

ثانيا أننا نخلي نقاشاتنا هنا بدل الفيس زفت ده
اللي الواد زونكربرج خربه ولا كأن أمه اللي جايباهوله

ويجعله عامر

ها مين معانااااااااا؟؟؟

ومين عنده اقتراحاااااااات؟؟؟

وصلت الرسالة يا مستر

انا بقترح اننا من غيراقتراحات لازم نرجع ندخل المنتدى تانى عشان احنا بنحبه
بس
اصل بصراحه التواجد لأى اسباب تانيه حتى لو كان منها النهوض بالمنتدى
تانى مش هيكون ممتع وبيخلى شخصية العضو تتغير


احنا ندخل زى ما كنا بندخل
يعنى ولا كأن حاجه حصلت
اللى فى دماغه موضوع يكتبه اللى بيحب موضوع لمتنا او صباح الخير
يخليه فيه واللى بيحب يشارك بس يعمل كده

احنا لما نكون موجودين هيسجل كل يوم اعضاء جداد وهيرجع المنتدى كما كان
واحسن ان شاء الله
واحنا مش عاوزين غير كده

ربنا يكرمك يا مستر

المشاريب تبقى ع حساب مستر محمد الاسوانى

والمشرفين

لحد المنتدى ما يرجع تانى

احم احم ..

هات يابنى سبعة ينسون هنا لفتافيت السكر على حساب مستر محمد ..
وحشتووووووووني يا أعضاء المنتدى الكراااام ..


فين أيام زماااااان .. والله زمان

بس أنا شايقة ان المنتدى موش محتاج عملية تجميل عشان يرجع كما كان..
هو بس محتاج الناس .. طالبات المدرسة واصدقاء وصديقات المنتدى يرجعوا تانى

طيب نتكلم في الموضوع المطروح أمام عدالتكم ..
الفيز بوك فعلا مكان ممل وعمره ماهيكون زي جو المنتديات ..
اولا كده محتاجين نعمل حصر بأزماء الأعضاء اللي كانو عاملين طعم وجو في المكان ..

بعد مانحصرهم في موضوع لوحده وهقولكم ليه كمان شوية .. نزن على ودانهم .. والزن عالودان أمر من السحر .. : طويب ازاي ..؟؟
قولتولي إزاي .. نقفش الأعضاء دول من على الفيتيز بوك وكلنا نبعتلهم رزايل ..
انا مثلا أبعت لميادة وأقول ..
همسااااات حبيبتييي وحشااااني جدااااا فينك وفين أيام المدرسة .. فاكرة !!!!

من ساعة ما رحتى الجامعة وانتى منفضة ..

تهون عليكي العشرة : .. ياللا ادخلي ده الحبايب كلهم متجمعين .. :
وننزل بأغنية عودي يابلية لعمرو دياب ..


ترجع تلاقينا عاملين الموضوع اللي قولنا عليه وفيه إسمها .. إهيييييييه ..؟؟
تفرح زيادة تلتصق بينا ومانعرفش نهشها وماتسيبناش ..

وصلت الرسالة يا مستر واوعد حضرتك اننا راجعين
فعلا حاسه ان

الشعب يريد العوده للمنتدى

كانت ايام جميله جدا كان الواحد يعمل ريفريش للصفحه يلاقى خمس ست مواضيع

يارب ترجع تانى الايام دى

والبت زينة وايامها الجمييييييييييييييله :

تصدق يا هدهد انا كنت ناسيه اسمك ايه ههههههههههه :

يارب ترجع تانى زى زمااااااااااان والناس تتلم فيها تانى

ياااارب

مش عارف اقول ايه......
لكن لازم نعترف ان كان فيه اخطاء مننا
لكن للاسف الناس كلها سابت المكان وراحت للفيس

يمكن هناك حرية اكتر بس هنا جو اسري اكتر دفئا ع العكس من الفيس تماما


لا تنسى ان المكان له فضل فى ان هو عرفك على ناس ...حتى لو فى ناس انا على خلاف معاهم الواحد بص على للجانب المشرق ان هو استفادتك خبرات وعرف نوعية من الناس...

يارب نرجع زي الاول
واعذروناعلى تقصيرنا

مين قال ان احنا مش موجودين نحن هنا يا مستر
بس الحكايه ان الفيس بوك خدنا كلنا واولهم حضرتك ولا ايه
بس انشاء الله خلاص هنرجع ونبات فيه كمان

ادينا رجعنا تاني اهو يا مستر
ولسا الي جي احلي انشاء الله

اكيد الي جاي احلي

احنا اهو يا مستر محمد موجودين ومش
هنمشى من اجمل منتدى جمعنا كلنا
وياريت كل الاعضاء اللى كانوا موجودين قبل لما ادخل
المنتدى يدخلوا تانى عشان نفسى اتعرف عليهم كلهم
وكل واحد نفسة يعمل اى فكرة يقول عليها ونتناقش فيها
تمتم
نووووووووووووووووودى

موش عارف ارد من فرحتى يا شباب والله

حضرتك رديت يا مستر لما بقيت تدخل المنتدى وتشارك
ويايلا يا شباب عايزة اشوف همتكم ومواضعكم الحلوة زيكم
وتشاركم برايكم وردكم على الموضوعات

يا مستر احنا مش محتاجين رد لان حضرتك بتخش ترد
علينا بمساهماتك ومواضيعك اللي بجد اكتر من رائعه
وخصوصا القصص اللي بتشدنا وفي الاخر بنكتشف انها خدعه

لا استطيع ان اصف سعادتى بعودتكم