نمرة العربية !!!!

من ساعة ما خلصت امتحاناتي وانا اقول لبابا والح عليه ان يجدد رخصة عربيتنا الماذدا وهو يقولي بكرة لغاية ما جه اليوم الموعود ولقيته بيصحيني النهاردة الصبح بدري ويقولي يالا يا حودة رايحين المرور
اخيرا يا بابا رايحين نجيب الارقام الجديدة لعربيتنا الحبيبة

رحنا المرور ووقفنا على الشباك وقالنا الموظف التخين ابو شنب تخين بصوت تخين روحوا هاتوا المخالفات اللي عليكم الاول

رحنا ووقفت انا في الطابور وبابا قاعد قلقان من المخالفات لغاية ما ندهو على اسمه وطلع ماعيناش مخالفات بس برضه دفعنا خمسة جنيه
اكيد بيعاقبوا بابا عشان بيتبع قواعد المرور ومبيرضاش يمشي مخالف

المهم رجعنا تاني للشباك قالنا ابو شنب تخين روحوا افحصوا العربية وادفعوا التأمين الاجباري والضريبة وتعالوا .. رحنا وبعد طوابير طويلة خلصنا وقاعدين تحت التندة مستنين الرخصة بالارقام الجديدة

بابا قعد يقرا الجورنال وانا قعدت اتفرج ع الناس ف المرور وسمعت حوار اتنين قاعدين ورانا بيتكلموا بصوت عالي

_ ربنا يستر من النمر الجديدة
_ ليه ما هي حلوة ولذيذة تلات حروف وتلات ارقام
_ ايوة ماشي بس فيه مشكلة
_ ايه يا عم ربنا ما يجيب مشاكل
_ التلات حروف ممكن يعملوا كلمة وحشة
_ ازاي يعني ؟!!!
_ يعني افرض حروفك كانت ج ح ش هتبقى ايه
_ جحش .. لا يا راجل
_ اه والله ممكن تحصل ولو كانت حروفك ن ط ع تبقى ( نطع )
_ لا لا أكيد المرور يخلوا بالهم ان مجموع الحروف ما تبقاش كلمة وحشة
_ طيب ربنا يستر

ندهوا اسم بابا وراح يستلم الرخصة الجديدة ويجيب الارقام الجديدة

وكانت المفاجـأة




ها يا بابا حروفك ايه
الحمد لله يا محمود طلعت ع ط س
يرحمكم الله يا بابا

ضحك وقالي
يهديكم الله ويصلح بالكم